Հեղինե Բիշարյանը համաձայն չէ, որ ՕԵԿ–ը որպես սպառված քաղաքական ուժ է ընկալվում. «Փաստ»

«Փաստ» օրաթերթը գրում է.

«Օրինաց երկիր» կուսակցության փոխնախագահ Հեղինե Բիշարյանի տրամադրությունը մայիսի 8–ին ԱԺ–ի կողմից վարչապետի պաշտոնում Նիկոլ Փաշինյանի ընտրվելուց հետո բարձր է: «Փաստ»–ի հետ զրույցում նա շնորհավորեց Նիկոլ Փաշինյանին, քանի որ, իր խոսքով, նա կարողացավ համառորեն պայքարել և հասնել նրան, ինչին ձգտում էր:

«Հիմա պետք է շնորհավորենք, և ինչ խոսք, նրանից մեծ ակնկալիքներ ունենք, քանի որ բազմաթիվ անգամ խոսվել և ներկայացվել են բազմաթիվ մտահոգիչ ուղղություններ: Վարչապետի պաշտոնում առաջադրվելու երկու օրերին էլ ես լսել եմ նրա մոտեցումները, ծանոթ եմ երկրի կառավարման նրա փիլիսոփայությանը: Եվ կարծում եմ, որ նա իր մեջ ուժ կգտնի իր գաղափարները կյանքի կոչելու համար: Ես ողջունում եմ իր այսօրվա հաղթանակը»,– ասաց Հ. Բիշարյանը:

Նա նաև նշեց, որ ակնհայտ փաստ է, որ առանց ժողովրդի աջակցության այդքան կարճ ճանապարհով Նիկոլ Փաշինյանը չէր կարող հասնել երկրի ղեկավարի պաշտոնին: Եվ նրա հաղթանակը նաև ժողովրդի կամքով էր պայմանավորված:

«Պետք է ողջունեմ մեր ժողովրդին, որը դրսևորեց իրեն որպես քաղաքացիական հասարակություն, քանի որ դա շատ–շատ կարևոր էր: Այս տարիներին քաղաքացիական հասարակության դրսևորման խնդիր կար երկրում, և այսօր դա իսկապես դրսևորվեց: Հասարակությունը կարողացավ մինչև վերջ կանգնել այն առաջնորդի կողքին, ով իրեն առաջ տարավ: Եվ իսկապես պետք է փաստենք, որ տեղի ունեցավ հաջողություն: Հաջողության հիմքում ընկած է ժողովուրդը և այն քաղաքական կամքը, որ օրեր շարունակ պայքարելով կարողացան հասնել իրենց նպատակին»,– ասաց ՕԵԿ փոխնախագահը:

Նա նաև նշեց, որ շարժման առաջին իսկ օրերից իրենք հստակ մեսիջներ են հղել և պաշտպանել են քաղաքական դաշտում տեղի ունեցող գործընթացները: Ու քանի որ արդեն ընտրվել է վարչապետ, ուստի այսուհետ ոչ թե կոչեր անելու, այլ գործելու ժամանակն է:

«Արդեն ժամանակն է, որ բոլորը աշխատեն: Մենք բնականաբար բաց քաղաքական ուժ ենք, և Արթուր Բաղդասարյանն իր բոլոր հայտարարությունների մեջ համատեղ աշխատելու պատրաստակամություն է հայտնել: Մեզ համար որևէ նշանակություն չունի ով է վարչապետը: Մեր քաղաքական թիմը, որը 30 տարիների ընթացքում 20 տարվա քաղաքական կենսագրություն ունի, լրջագույն օրենսդրական աշխատանքների և կառավարման մեծ փորձ ունի, իսկ կուսակցության ղեկավար Արթուր Բաղդասարյանը երկրի լրջագույն պաշտոններն է զբաղեցրել»,– ասաց Հ. Բիշարյանը:

Նա համաձայն չէ այն տեսակետին, որ չնայած երկարամյա գործունեությանը, հասարակությունն այլևս չի ընդունում ՕԵԿ–ին և համարում է, որ նրանք այլևս սպառել են իրենց:

«Ես բացարձակ համաձայն չեմ, և դուք ծիծաղելի բան եք ասում: Մի մոռացեք, որ մեկ տարի չկա, որ մեր քաղաքական ուժը խայտառակ ընտրակաշառքների և ընտրակեղծիքների արդյունքում 60 հազար ձայնով դուրս մնաց խորհրդարանից: Ես կարծում եմ, որ և՛ խորհրդարանական, և՛ արտախորհրդարանական ուժերի մեջ կան տաղանդավոր, գրագետ, բանիմաց քաղաքական գործիչներ, որոնք երբեք չեն սպառվում: Եվ նրանց ներուժը պետք է օգտագործել հանուն Հայաստանի: Իսկ մեր կուսակցության ղեկավարի և՛ ներուժը, և՛ կրթությունը, և՛ անցած ճանապարհը, ով միշտ ծառայել է Հայաստնի Հանրապետությանը և եղել է պետականամետ քաղաքական գործիչ, կարծում եմ, այսուհետ ևս կծառայի մեր երկրին: Առջևում խորհրդարանական ընտրություններ են լինելու, և ես վստահ եմ, որ Փաշինյանը կամք կունենա փոխելու այդ խայտառակ ռեյտինգային համակարգը, կվերանան օդից գրված ցուցանիշները, քանի որ մեր երկրում այդքան ընտրողներ չկան, որքան գրվել են, և պարզ ու թափանցիկ ընտրություններ կլինեն, որի արդյունքում բոլորը կտեսնեն, որ մենք մեր դերը կունենանք ապագայում երկրում տեղի ունեցող քաղաքական գործընթացներում»,– ասաց Հ. Բիշարյանը:

Նա նաև հավելեց, որ եթե կամք լինի, իրենց քաղաքական ուժը կաջակցի, որպեսզի երկրում իրապես բան փոխվի, քանի որ ՕԵԿ–ը ոչ միայն ներկայի, այլև ապագայի մասին է մտածում:

Շարունակությունը՝ «Փաստ» օրաթերթի այսօրվա համարում