Լալա Բեռնեցյան. «Սերժ Սարգսյանի հրաժարականի մասին լսելով` ուրախությունից լաց եղա». «Փաստ»

«Փաստ» օրաթերթը գրում է.

«Փաստ»–ի զրուցակիցն է Սարի թաղի 2016 թ. հուլիսի 19–ի դեպքերով հարուցված քրեական գործի շրջանակում կալանավորված Էդուարդ Զեյթունցյանի կինը՝ Լալա Բեռնեցյանը

– Սարի թաղի բնակիչները և գործով կալանավորված 10 տղաների հարազատներն մասնակցե՞լ են երթերին, հանրահավաքներին։

– Կալանավորների ընտանիքներն առանձին–առանձին ոչինչ չարեցին, որովհետև մենք ունենք Սարի թաղ։ Պայքարի շուրջը համախմբված մենք կատարեցինք պայքարի հրահանգները, փակել ենք ճանապարհներ, արտահայտել ենք մեր կարծիքը, օժանդակել, մենք էլ ենք համակարծիք եղել, որ արդեն դանակը ոսկորին է հասել և չի կարելի այսպես համակարգ պահել։

– Նիկոլ Փաշինյանի՝ վարչապետ լինելու, ՀՀԿ–ի՝ այլևս իշխանություն չլինելու հետ կապված ի՞նչ հույսեր ունեք, հատկապես ձեր ամուսինների՝ ազատ արձակվելու վերաբերյալ։

– Ես մեծ հույսեր ունեմ, քանի որ Նիկոլ Փաշինյանը անձամբ եղել է քաղաքական հետապնդումների զոհ, քաղբանտարկյալ, ունեցել է քաղաքական նկատառումներ, որի համար և բանտարկվել է։ Նա մեզ ավելի ճիշտ կհասկանա։ Նա անձամբ տեղյակ է մեր ընտանիքների վատ վիճակի մասին, մեր բոլոր գործողություններից, այն, որ Սարի թաղը նույնպես աջակցել է իրենց մինչև վերջին պահը։

Առաջին հերթին շատ ուրախ եմ, որ ՀՀԿ–ն թուլացել է, որ նա որպես քաղաքական ուժ այլևս ոչինչ չի ներկայացնում, որովհետև ՀՀԿ–ի մոտ ամեն ինչը չափից դուրս էր։ Բեսպրեդելի սահմաններն էր անցել, քաղաքում իշխում էին կրիմինալ տարրերը, թեկուզ թաղային խուժանի տեսքով, որոնք իրենց դեմքը լավ ներկայացրին այս հավաքների ժամանակ։ Բոլորը տեսան։ ՀՀԿ–ն պետք է պատժվի մինչև վերջ։ Ամեն դեպքում, եթե այսօր Սարի թաղն ունի 10 բանտարկյալ, դա ՀՀԿ–ի շնորհիվ է։ ՀՀԿ–ի ղեկավարը որոշել էր, որ այդ 10 հոգին պետք է պատժվեն, քանի որ իրենք դուրս էին եկել, իրենց կենցաղային հարցերն էին բարձրացրել։

– Նախորդ շաբաթ, երբ իմացաք, որ Սերժ Սարգսյանն այլևս վարչապետ չէ, ի՞նչ զգացիք, ի՞նչ ակնկալեցիք։

– Այդ օրը հույսերս մեծացան։ Չնայած մինչ այդ էլ արդեն հույսեր կային, որովհետև նայում էիր գործի բնույթին, դատական նիստերին, գործն ընդհանրապես չէր գնում առաջ, ոչ մի վկայություն չեն տալիս։ Հասկացանք, որ չի կարող սա այսպես շարունակվել։ Ինչ–որ մի բան մի տեղ պայթելու է։ Մարդիկ արդեն 2 տարի նստած են, չեն դատվում, որովհետև իրենք մեղավոր չէին. իշխանության ներկայացուցչի հանդեպ ոչ մի ոտնձգություն 10–ից որևէ մեկը չի կատարել։

Դրա համար էլ ես նույնիսկ ուրախությունից արտասվել եմ, որ Սերժ Սարգսյանը հրաժարական է տվել։ Ասում են թունելի վերջում միշտ լույս է վառվում, դա էր իմ լույսը, որ նա հրաժարական տվեց։ Գոնե այս բռնատերից ազատվեցի։

Ես համոզված եմ, որ Նիկոլ Փաշինյանը կանդրադառնա Սարի թաղի տղաներին, որովհետև դեպքի ժամանակ նա եղել և տեսել է՝ ինչ է կատարվել այնտեղ։

– Դուք ձեզ համար մոտավորապես ինչպիսի՞ վերջնաժամկետ եք դրել, որ այ այսքան ժամանակ հետո հույս ունեք, որ ձեր ամուսինը ձեր կողքին կլինի։

– Շատ շուտով։ Մենք Փաշինյանին նաև նամակ կուղարկենք, նա շատ անաչառ մարդ է, ես չեմ կասկածում մեկ վայրկյան, քանի որ եղել են դեպքեր, որ նա ինձ աջակցել է, իմ ամուսնու գործը, արդարացման վճիռը վերցրել է, որպեսզի միջնորդություն ներկայացնի դատախազություն իմ ամուսնու գոնե խափանման միջոցը՝ կալանավորումը փոխեն, նա տեղյակ է եղել իմ ծանր վիճակի մասին։ Միակ պատգամավորն է, որ հետաքրքրվել է, թե տղաների ընտանիքներն ինչպես են ապրում, ինչով կարողացել է՝ օգտակար է եղել։

– Ձեր ամուսինը ինչպե՞ս է արձագանքել այս գործընթացին։

– Նա շատ մեծ հույս ունի, որ շատ շուտով ազատվելու է, և ես չեմ կարծում, որ Նիկոլ Փաշինյանը կարող է իր հույսերը մարել։ Այն, որ մենք պրծանք ՀՀԿ–ից, շատ մեծ ձեռքբերում էր։

Շարունակությունը՝ «Փաստ» օրաթերթի այսօրվա համարում