Արթիկի ՀՀԿ թեկնածու Մուշեղ Պետոյան. «Տեղյակ եմ, որ Արթիկի քաղաքապետը իմ թիմակիցներից 5–6 հոգու ազատել է». «Փաստ»
«Փաստ» օրաթերթը գրում է.
Ընտրություններին ընդառաջ Շիրակի մարզում ուշագրավ իրավիճակ է ստեղծվել: Որոշ ՀՀԿ–ականներ ու նրանց մերձավորներ սատարում են Դաշնակցությանը:
Մամուլում գրվել է, որ Շիրակի դաշնակցական մարզպետ Հովսեփ Սիմոնյանը Շիրակի փոխմարզպետ է նշանակել Արթիկի քաղաքապետ Մխիթար Վարագյանի եղբորը՝ Խաչիկ Վարագյանին: Արթիկի գազի գրասենյակի պետ Խաչիկ Վարագյանը, ազատվել է աշխատանքից, ու նրա նախկին աթոռը զբաղեցրել է որդին՝ Հայկ Վարագյանը:
Ասվում է նաև, որ Արթիկի քաղաքապետն էլ իր հերթին սկսել է կադրային ջարդ քաղաքապետարանում նրանց նկատմամբ, ովքեր իր ընտրության ժամանակ քվեարկել են այլ թեկնածուի օգտին:
«Փաստի» հետ զրույցում Արթիկի ՀՀԿ ռեյտինգային թեկնածու, նախկին ԲՀԿ–ական Մուշեղ Պետոյանը հաստատեց տեղեկությունը, որ Մխիթար Վարագյանը կադրային ջարդ է իրականացնում ու ազատում իր կողմնակիցներին, իսկ նրա եղբայրը՝ Խաչիկ Վարագյանը, պատրաստվում է առաջադրվել ՀՅԴ–ի ցուցակով:
Արթիկի տարածաշրջանը հետաքրքիր է նաև նրանով, որ աշնանը կայացած քաղաքապետի ընտրությունների ժամանակ տեղի ՀՀԿ կառույցը որոշեց սատարել ոչ թե ՀՀԿ թեկնածու Մուշեղ Պետոյանին, այլ ՀՀԿ–ական Մխիթար Վարագյանին, որն էլ դարձավ քաղաքապետ:
Ներկայացնում ենք ՀՀԿ ռեյտինգային թեկնածու, նախկին ԲՀԿ–ական Մուշեղ Պետոյանի հետ մեր հարցազրույցը:
– Պարոն Պետոյան, մամուլում տեղեկություն կա, որ Շիրակի մարզպետը փոխմարզպետ է նշանակել Մխիթար Վարագյանի եղբորը՝ Խաչիկ Վարագյանին: Արդյոք Վարագյաններն այսօր Դաշնակցութան համա՞ր են աշխատում, և Ձեզ համար սա ի՞նչ հետևանքներ կարող է ունենալ:
– Դեռ փոխմարզպետ չի նշանակվել, որքան գիտեմ: Խաչիկ Վարագյանն առաջադրվում է Դաշնակցության ցուցակով: Դաշնակցությունը Մխիթար Վարագյանին է սատարել քաղաքապետի ընտրություններում, հիմա իրենք էլ Դաշնակցությանն են օգնելու: Դե, մարզպետը դաշնակցական է, էստեղ միշտ էլ դաշնակցականներն ակտիվ են եղել: Էն ժամանակ էլ հակառակորդներ ենք եղել, էս անգամ էլ փաստորեն, բախտի բերմամբ թե պատահմամբ, նորից ենք հակառակորդներ: Ամենքս մեր թիմն ունենք, ամենքս մեր ձևավորած համախոհներն ունենք: Չեմ կարծում, որ ինչ–որ բան պիտի փոխվի: Դաշնակցությունը փորձում է վարչական լծակներ օգտագործել, բայց վերջը ես էլ գործող պատգամավոր եմ, էդպես հեշտ չի էդ վարչական լծակներն օգտագործելը:
– Նախորդ անգամ, չնայած ՀՀԿ–ն պաշտոնապես հայտարարեց, որ Ձեզ է սատարում, սակայն Արթիկի ՀՀԿ կառույցը սատարեց Վարագյանին և վերջինս հաղթեց, հիմա հնարավո՞ր է Արթիկի ՀՀԿ կառույցը կրկին Ձեզ չսատարի ու Դուք պարտվեք:
– Դեռ իրենց հետ հանդիպում տեղի չի ունեցել, որովհետև երեկ ենք վերջնական որոշում կայացրել, որ մասնակցում ենք, բայց չեմ կարծում, որ ՀՀԿ–ականները սատարեն դաշնակցականներին կամ ՀՅԴ ցուցակում հայտնվածին: Անցած անգամ Վարագյան Մխիթարը էլի ՀՀԿ–ական էր: Անցած անգամ մենք թերևս շատ էինք ինքնավստահ և լավ չէի աշխատել: Էս անգամ կփորձենք մեր սխալը շտկել:
– Մամուլում տեղեկություն կա նաև, որ Արթիկի քաղաքապետ Մխիթար Վարագյանը կադրային ջարդ է սկսել: Դա ճի՞շտ է:
– Տեղյակ եմ, որ քաղաքապետը 5–6 հոգու ազատել է: Իմ թիմակիցներն են, ինձ օգնել են, ակնհայտ է պատճառը: Ազատելու ոճը այլ տարբերակով է՝ կառուցվածքային փոփոխություն անելու հետևանքով: Հաստիքները փակել են, կամ առաջարկել են այնպիսի աշխատանք, որը հարմար չէր, արդեն հրաժարվում են, դուրս են գալիս:
– Իսկ Մխիթար Վարագյանի կողմից պրոդաշնակցական քայլեր նկատե՞լ եք:
– Դե հա, իրենց թիմակիցներով բոլորի ուղղվածությունն էլ դեպի էդ կողմն է: Էս պահի դրությամբ դեռ ակտիվ էդպես աշխատանք չի նկատվում, բայց արդեն մոտակա օրերին կերևա՝ ինչ պայմանավորվածություն ունեն Դաշնակցության հետ:
– Պարոն Պետոյան, մյուս կողմից Ձեր գործունեությունը խորհրդարանում շատ ակտիվ չի եղել օրենքներ գրելու և ելույթներ ունենալու իմաստով, ինչո՞ւ եք կրկին գնում խորհրդարան:
– Ակտիվ չի եղել ԱԺ–ի իմաստով, բայց ակտիվ է եղել ազգաբնակչության և ընտրողների հետ, էդ փաստ է: Էսօր մեր ազգաբնակչության հետ որ շփվում ենք, տեսնում ենք, որ գոհ են: Քաղաքապետի ընտրություններից հետո կապերը մնացել են: Հանրապետական կուսակցության հետ խոսելուց, բանակցություններ վարելուց հետո որոշում կայացրինք, որ ես առաջադրվում եմ:
Շարունակությունը` «Փաստ» օրաթերթի այսօրվա համարում:
Жители Тигранашена не имеют права собственности и живут в постоянном ощущении угрозы (Видео)
Геополитическое балансирование — на «нитке». «Паст»
Ужас на дорогах Армении. «Паст»
С кем же на самом деле встретился Никол Пашинян? «Паст»
Пашинян втягивает Армению в очень опасную «игру». «Паст»
ВТБ (Армения) упростил процесс автокредитования на первичном рынке
Трамп принял 10 требований Ирана перед двухнедельным перемирием
Армия Ирана пригрозила отбросить военных США в период до каменного века
Власти уже «цепляются за соломинку». «Паст»
Одним из главных рисков выборов является распыление голосов. «Паст»
