«Ամերիաբանկի»՝ Ամուլսարի ծրագրի համար վարկ տրամադրելը կարող է վնասել բանկի իմիջին.«Փաստ»

«Փաստ» օրաթերթը գրում է.

Նոյեմբերի 4–ին պաշտոնապես հայտարարվեց, որ «Լիդիան Արմենիա» ընկերությունը «Ամերիաբանկ» ՓԲԸ–ի հետ կնքել է 24 միլիոն ԱՄՆ դոլարի գրավով ապահովված վարկային պայմանագիր և վարկը պետք է օգտագործվի Ամուլսարի ծրագրի համար սարքավորումների ձեռքբերման նպատակով: Այդ ծրագիրն իրենից ներկայացնում է Ամուլսար լեռան հանքավայրի շահագործումը:
«Ամերիաբանկի» կողմից նման ծրագրին «օժանդակելը» բավական մեծ զայրույթ է առաջացրել, թե՛ բնապահպանների, թե՛ հասարակության լայն զանգվածների շրջանում: Վերջիններս կոչ են անում բանկի բոլոր հաճախորդներին փակել իրենց հաշիվները և հրաժարվել բանկի ծառայություններից:

Եթե միայն հաշվի առնենք, որ «Ամերիաբանկի» ֆեյսբուքյան պաշտոնական էջը վերջին մի քանի օրերի ընթացքում ողողվել է բանկի՝ Ամուլսարի ծրագիրն իրականացնելու համար օգտատերերի մեղադրանքներով և քննադատություններով, ապա դա «Ամերիաբանկին» մտածելու տեղիք պիտի տա, քանի որ բանկում իրենց հաշիվները փակելու վերաբերյալ մարդկանց ֆեյսբուքյան գրառումները շատ շուտով կարող են իրականություն դառնալ:

Երեկվա դրությամբ բանկի ֆեյսբուքյան էջին արձագանքողներից 371–ը «Ամերիաբանկի» էջը գնահատել է մեկ միավոր, ինչի արդյունքում բանկի էջի վարկանիշը նվազել է և կազմել երկու միավոր:

Աշխարհագրագետ, «Հայկական բնապահպանական ճակատ» քաղաքացիական նախաձեռնության անդամ Լևոն Գալստյանը իր կարծիքն է հայտնել «Փաստին»՝ «Ամերիաբանկի» կողմից Լիդիանին վարկ տրամադրելու հետ կապված:
«Բացի այն, որ այդ ծրագիրը ֆինանսավորվում է տարբեր միջազգային ֆինանսական կազմակերպությունների ու բանկերի կողմից, պարզ դարձավ, որ նաև մեր տեղական բանկն էլ է մասնակցում այս ծրագրին: Մենք բազմաթիվ անգամներ դիմել ենք այդ կազմակերպություններին, իրենց ներկայացրել հիմնավորված բողոքներ վտանգների մասին, ասել ենք, որ չպետք է ֆինանսավորել նման վտանգավոր ծրագիր, քանի որ դա էկոլոգիական լուրջ խնդիրներ կարող է առաջացնել: Հիմա նույն բաները պիտի ներկայացնել նաև «Ամերիաբանկին»»,– ասաց նա:

Լևոն Գալստյանի խոսքով՝ բազմաթիվ փորձագետներ ու մասնագետներ համոզված են, որ այդ ծրագիրը վտանգում է Հայաստանի քաղցրահամ ջրերի պաշարները, հանքի շահագործման պարագայում անմիջական ազդեցության են ենթարկվելու Որոտան և Արփա գետերի ավազանը, Կեչուտի և Սպանդարյանի ջրամբարները, Որոտան–Արփա–Սևան թունելի միջոցով` նաև Սևան լիճը:

«Միայն այդ վտանգը հաշվի առնելով՝ այս ծրագիրը իրավունք չունեն իրականացնելու, որովհետև մենք մեր էկոլոգիական ազգային անվտանգությունն ենք դնում սպառնալիքի տակ: Քաղցրահամ ջուրը մեր գլխավոր ռազմավարական պաշարն է և՛ բնության, և՛ մարդկանց նորմալ ապրելակերպը ապահովելու համար: Եթե կա նույնիսկ տեսական վտանգ էդ խնդրի համար ո՛չ մի ոսկու պաշար, ո՛չ մի կասկածելի եկամուտ, ո՛չ անգամ 500–600 աշխատատեղի ստեղծումը չի կարող դրա դիմաց փոխհատուցում լինել»,– նշում է աշխարհագրագետը:

Լևոն Գալստյանի կարծիքով, եթե «Ամերիաբանկը» համարում է, որ այդ վտանգները չկան, ուրեմն բանկի ղեկավարությունը կամ ընդհանրապես տեղեկացված չէ, կամ իրեն «Լիդիանը» և մնացած ֆինանսական կազմակերպությունները թյուրիմացության մեջ են գցել: «Ինքը վարկ է տվել, ակնկալիքներ ունի, բայց վարկը տալիս պիտի հաշվի առնել նաև հետևանքները այն երկրի համար, որի բանկն ես դու համարվում այսօր: Դրսինները հասկացանք, իրենց չի հետաքրքրում Հայաստանի ապագան, բայց քանի որ «Ամերիան» Հայաստանի բանկ է և նրա հիմնադիրների խմբում կան այնպիսի մարդիկ, ովքեր այլ տեսլական ունեն Հայաստանի վերաբերյալ՝ այդ ծրագրին վարկ տալը նաև շատ զարմանալի է մեզ համար»,– հավելեց նա:

Վերջինս ասում է, որ դեռևս պաշտոնապես չեն դիմել բանկին, պատրաստվում են մի քանի օրից բանկի գլխավոր գրասենյակի դիմաց բողոքի ցույց անցկացնել: Նախկինում միայն հրապարակումներ են եղել մամուլում և ըստ Գալստյանի՝ եթե իրենց հետաքրքրում է, ինձ թվում է կարդացած կլինեն:

Շարունակությունը` «Փաստ» օրաթերթի այսօրվա համարում: