ՓՊ ֆինանսական չարաշահումների ոդիսականից մինչև խորհրդի ընտրություններ. «Փաստ»

«Փաստ» օրաթերթը գրում է.

Փետրվարի 11–ին Փաստաբանների պալատում տեղի կունենա պալատի խորհրդի անդամների ընտրություն: Ի թիվս այլոց, խորհրդի ընտրություններին մասնակցելու դիմում են ներկայացրել Փաստաբանների պալատի նախկին նախագահ Ռուբեն Սահակյանը և նախկին գլխավոր հաշվապահ Կարինե Սարգսյանը, ովքեր պալատում հայտնաբերված ֆինանսական չարաշահումների աղմկահարույց պատմության մեջ ներգրավված անձինք են: Նշենք նաև, որ քաղաքացիական վեճից բացի, ներկայում գործով նաև քրեական գործ կա հարուցված, որն առայժմ գտնվում է նախաքննության փուլում: Այս պայմաններում հետաքրքիր է, թե ինչու են նրանք երկուսն էլ որոշում կայացրել մասնակցել պալատի խորհրդի ընտրություններին:
Պալատի նախկին գլխավոր հաշվապահ Կարինե Սարգսյանը «Փաստի» հետ զրույցում ասաց, որ ինքը նախկինում երկու անգամ ընտրվել է խորհրդի կազմում:
«Այս անգամ էլ ցանկություն ունեցա կրկին առաջադրվել: Կընտրվեմ՝ լավ, չեմ ընտրվի՝ ոչինչ»,– ասաց Կ. Սարգսյանը:
Ինչ վերաբերում է դատական վեճերին, ապա դրանք երկուսն են: Մեկը դատաքննության փուլում է, մյուսը՝ նախաքննության: Նախկին հաշվապահը հույս ունի, որ Փաստաբանների պալատում իրականացված ստուգումների արդյունքում հայտնաբերված չարաշահումների հետ կապված քրեական գործի նախաքննության ընթացքում բոլոր հանգամանքները կպարզվեն:
«Ես հույս ունեմ, որ ում պատճառով ես հայտնվել եմ նման իրավիճակում՝ կորցրել եմ բնակարանս, ամբողջ գույքս, բոլոր իրական մեղավորներն ի հայտ կգան: Ես ուզում եմ, որպեսզի դրանից հետո գոնե կարողանամ իմ անունը փրկել»,– ասաց Կ. Սարգսյանը:
Հարցին, թե նման վեճի և փոխադարձ մեղադրանքներ հնչեցնելու պարագայում նույն խորհրդում ՓՊ նախկին նախագահ Ռուբեն Սահակյանի հետ համատեղ աշխատանքն ինքն ինչպես է պատկերացնում, առավել ևս, որ կան նաև անավարտ դատական ու քրեական գործեր, նախկին գլխավոր հաշվապահը պատասխանեց. «Ես Ռուբեն Սահակյանի հետ այս պահին կապ չունեմ, քանի որ նա ամեն ինչ անում է, որպեսզի ճնշում գործադրի ինձ վրա: Ես չգիտեմ, թե նա ինչու է դրել իր թեկնածությունը: Դա ինձ չի հետաքրքրում: Ես միայն ուզում եմ, որ պարզվեն բոլոր հարցերն ու մաքրվի ամեն ինչ: Ես 30 տարի է Փաստաբանների պալատում եմ աշխատել, նրան վստահել և ընդունել եմ որպես ծնող: Միշտ մտածում էի, որ վեճը դուրս չգա պալատի սահմաններից: Հետո տեսա, որ ամբողջ գործը բարդում են ինձ վրա, ես սկսեցի հրապարակային հանդես գալ»:
Գլխավոր հաշվապահի խոսքով՝ 2014 թ.–ի մարտին ֆինանսական ստուգումների արդյունքում 35 մլն դրամի խախտում է հայտնաբերվել, որից հետո էլ սկսվել է այս պատմությունը:
«Դրանից հետո ես սկսեցի բողոքել, հիմա էլ իբր թե 133 միլիոն դրամի խախտում է հայտնաբերվել: Բայց դա ոչ մասնագետների միջոցով է իրականացվել: Հիմա համալիր փորձաքննություն է նշանակված: Բոլոր չեքերը կան, ստորագրություններից առաջինը պալատի նախագահի ստորագրությունն է եղել, երկրորդը՝ իմը, երրորդը՝ գանձապահինը: Գործատու է ասել, ես էլ ստորագրել եմ, բայց ոչ մի գումար իմ մասով դուրս չի եկել պալատից: Բանկային չեքերը կան: Շինարարական աշխատանքեր են կատարել, մուտք չեն արել և այլն: Ամեն ինչ իր ժամանակին կպարզվի»,– ասաց Կ. Սահակյանը:
Այսքանից հետո, թեև նա կորցրել է իր վստահությունը Փաստաբանների պալատի նախկին նախագահի հանդեպ, սակայն կարծում է, որ երկար տարիներ համակարգում աշխատելուց հետո խորհրդի կազմում ընտրվելու հնարավորությունը լավ շանս է իր համար, որպեսզի կարողանա անկողնում պառկած հիվանդ ամուսնուն և երկու անչափահաս երեխաներին խնամելու գումար վաստակել:
Ի դեպ, հարգելով ՓՊ նախկին նախագահ Ռուբեն Սահակյանի խոսքի իրավունքը, մենք պատրաստվում ենք նաև նույն հարցադրումներն ուղղել նրան: Ուստիև առաջիկայում կներկայացնենք նաև Ռ. Սահակյանի տեսակետը, թե՛ նշված վեճի և թե՛ նրան հայրաբար վերաբերվող գլխավոր հաշվապահի մասին:

Շարունակությունը` «Փաստ» օրաթերթի այսօրվա համարում: