Իշխանությունների «էստի համեցեքին» կարձագանքեն միայն միամիտները. «Փաստ»
«Փաստ» օրաթերթը գրում է.
Պարզվում է, որ ցանկացած բիզնես սկսելու համար տվյալ ոլորտն ուսումնասիրելու, բիզնեսի տվյալ ուղղության մեջ բաց կետերը գտնելու և այդտեղ ներդրում կատարելու որոշում կայացնելուց առաջ նախաձեռնողը պետք է կամ հազար ու մի դուռ թակի, կամ ամիսներով նստի համակարգչի առջև: Եվ այդքան երկար ծախսած ժամանակի արդյունքում որևէ երաշխիք չկա, որ համացանցից կամ հազար ու մի դուռ թակելու արդյունքում հնարավոր կլինի ինչ–որ բան հասկանալ, թե որտեղից է հարկավոր սկսել, որտեղից ավարտել:
Պարզվում է նաև, որ ՀՀ տնտեսական զարգացման և ներդրումների նախարարության առանձնացված ստորաբաժիններ և պետական մարմիններ բաժնում կա, գոյություն ունի նաև Լիցենզավորման և թույլտվությունների գործակալություն, որի մասին, ինչքան էլ որ զարմանալի է, բացի գործակալության պետի անունից, հեռախոսահամարից ու հետևյալ բովանդակությունից՝ «Լիցենզավորման և թույլտվությունների գործակալությունը մատուցում է ծառայություններ լիցենզիաների, թույլտվությունների, Քիմբեռլիի սերտիֆիկատների, հյուրանոցային տնտեսության օբյեկտների որակավորումների և եզրակացությունների տրամադրման բնագավառում: Գործակալությունը տրամադրում է առևտրի իրականացման վայրի կազմակերպման, չափման միջոցի արտադրության լիցենզիաներ, շրջանառության հսկողության ոլորտում հսկվող ապրանքների արտահանման և հսկվող ոչ նյութական արժեքների փոխանցման թույլտվություններ և իրականացնում է Հայաստանի Հանրապետության տարածքով երկակի նշանակության ապրանքների տարանցիկ փոխադրման մասին ծանուցագրերի ընդունման գործընթացը: Այն նաև տրամադրում է եզրակացություն «Ժամանակավոր ներմուծում (արտահանում)» մաքսային ռեժիմով ներմուծված (արտահանված) ապրանքների վերամշակման արդյունքի մասին», այլ բան իմանալ հնարավոր չէ:
Զարմանալի է, բայց կարծես թե 21–րդ դարի տեխնոլոգիաները շրջանցել են այս գործակալությանը և փաստացի հնարավոր չէ իմանալ, թե օրինակ՝ հաշվետու ժամանակահատվածում քանի բիզնես է Քիմբեռլիի սերտիֆիկատ ստացել, քանի հյուրանոցային տնտեսության օբյեկտների որակավորումներ և եզրակացություն է տրամադրվել, որքան պետք է վճարել նման սերտիֆիկատ ստանալու համար և այլն:
Կարճ ասած՝ պետական մարմին, որի մասին գիտեն միայն ոլորտի գիտակները, կամ յուրայինները: Եվ այս պայմաններում խոսել կոռուպցիայի դեմ պայքարի և այլ լուրջ թեմաների մասին, մեղմ ասած, լուրջ չէ:
Ամենայն հավանականությամբ այս գործակալության գոյության համար պետությունը պետական բյուջեից բավականին գումար է ծախսում: Մի մասն էլ, կրկին՝ ամենայն հավանականությամբ, գործակալությունն է կարողանում «աշխատել» սերտիֆիկատներ տալու և այլ ծառայություններ մատուցելու միջոցով: Բայց հետաքրքիր է, թե հասարակությունն ինչպես կարող է իմանալ կամ վերահսկողություն իրականացնել այսօրինակ գործակալությունների գործունեության հանդեպ, եթե այն ընդամենը մի երկու տողով է ներկայացված, այն էլ՝ անհասկանալի բառապաշարով:
Մի խոսքով, հարգելի իշխանություններ, մարդիկ այլևս առաջվա միամիտը չեն, և եթե այդքան ուզում եք, որ դրսից Հայաստան ներդրողներ գան, կամ Հայաստանում ՓՄՁ–ները զարգանան, ապա տարբեր թաքստոցներից պետք է դուրս բերեք այս և նմանատիպ գործակալություններին, տեսանելի դարձնեք նրանց գործունեությունը և թույլ տաք, որ բիզնեսի ցանկություն ունեցողը ինքնուրույն հասկանա, թե հյուրանոցային կամ այլ բիզնես սկսելու համար նախնական ինչքան գումար պետք է ներդնի:
Հակառակ դեպքում «էստի համեցեքին» կարձագանքեն միայն միամիտները: Ու քանի որ, մեր մեջ ասած, այլևս միամիտներ չկան, որ հայրենիքի կանչով ու ծտի թևով իրենց գումարները վերցնեն ու նոր բիզնես սկսելու համար հևիհև Հայաստան գան, ուստի պարզ է՝ չէ՞, որ սիրուն տեքստերն ու պայծառ տեսահոլովակներն էլ չեն օգնի: Այնպես որ, նախ սեփական դռներն ու օրենքները բացեք, հետո նոր միայն մարդկանց հրավիրեք:
Շարունակությունը՝ «Փաստ» օրաթերթի այսօրվա համարում
Вступило в силу постановление правительства о порядке расчета налога исходя из мощности двигателя эл...
Жители Тигранашена не имеют права собственности и живут в постоянном ощущении угрозы (Видео)
Геополитическое балансирование — на «нитке». «Паст»
Арестовать весь армянский народ не получится: «Паст»
С кем же на самом деле встретился Никол Пашинян? «Паст»
ВТБ (Армения) упростил процесс автокредитования на первичном рынке
Emirates: Гражданам Ирана запрещён въезд и транзит через ОАЭ
Армяне Москвы встретили Пашиняна акцией «Мы с Эчмиадзином»: «Паст»
Армия Ирана пригрозила отбросить военных США в период до каменного века
Власти уже «цепляются за соломинку». «Паст»
