«Լուսավոր Հայաստանը» փորձում է կապանքների մեջ պահել «Քաղաքացիական պայմանագրին». «Փաստ»

«Փաստ» օրաթերթը գրում է.

Վարչապետի թեկնածուի շուրջ խմորումները թեև որոշակի հստակություններով, այնուամենայնիվ, դեռ քննարկման կենտրոնում են: Արտախորհրդարանական ուժերը և խորհրդարանական «Ելք» խմբակցության առանձին ներկայացուցիչներ շարունակում են հայտարարել ՀՀ գործող նախագահ Սերժ Սարգսյանի՝ վարչապետի պաշտոնում հնարավոր առաջադրումը կանխելու մասին:

«Ազգային համաձայնություն» կուսակցության ղեկավար Արամ Հարությունյանի կարծիքով՝ «Ելք»–ն, ըստ էության, խորհրդարանում միասնական օրակարգով հանդես չի գալիս:

«Կարելի է ասել, որ «Ելք»–ը, ըստ իրենց հայտարարությունների, սեպարատ է գործելու: Իսկ քանի որ պառլամենտական ընտրությունները կեղծվել են, ապա ժողովրդի նախասիրությունների ծանրության կենտրոնը ոչ թե խորհրդարանում է, այլ՝ խորհրդարանից դուրս: Ծանրության կենտրոնը արտախորհրդարանական ուժերի էլեկտորատի մեջ է: Հիմա՝ ինչ վերաբերում է օրակարգին: Մեր կուսակցության տեսակետը հետևյալն է. քանի որ ընտրությունները կեղծվել են, ուստի Հանրապետական կուսակցությունը վարչապետի թեկնածու առաջադրելու իրավունք չունի: Մյուս կողմից՝ ապրիլի 9–ից 18–ը բացառիկ ժամանակահատված է, Սերժ Սարգսյանը՝ իշխանություն կրողը, իրավական որևէ լծակ չի ունենալու: Կարելի է ասել, որ դա այն էտապն է, երբ իշխանության համակարգն ամենաթույլը կլինի: Բացի այդ, հասկանում ենք, որ իրականում Սերժ Սարգսյանը չի վայելում իր թիմակիցների անկեղծ համակրանքը: Ուրիշ խնդիր է, որ իրենք այսօր վախեցած են, որ ճնշման տակ են, բայց եթե պահը գա՝ իրենք շատ հանգիստ չեն քվեարկի Սերժ Սարգսյանի օգտին»,– «Փաստ»–ի հետ զրուցում ասաց կուսակցության ղեկավարը:

Նրա խոսքով՝ կարևոր է ֆիքսել նաև, թե ով է իրական ընդդիմությունը:

«Կարելի է խոսել ընդհանուր համակարգից, փոփոխություններից, ապագայից, բայց կրիտակական պահի դիրքորոշում ցույց չտալ, ինչպես հիմա տեսնում ենք «Ելք»–ի դեպքում: Խմբակցության տարբեր թևերով հանդես գալը հենց դա է ցույց տալիս: Այսօր «Ելք»–ը հայտնվել է անելանելի վիճակում: Համենայն դեպս, Նիկոլ Փաշինյանը փողոց է դուրս գալիս, իսկ գրեթե մնացածը, ըստ էության, ոչ: Բայց ձայներ եք տարել ու ասել, որ դեմ եք համակարգին, ձեզ որպես ընդդիմություն են ձայն տվել: Հետո հայտարարել եք, որ խորհրդարանում ամենաարմատականն եք, բայց պարզվում է՝ նույնիսկ չեն էլ համարձակվում Սերժ Սարգսյանին հարցեր տալ կապված ընդհանուր իրավիճակի, ապրիլյան պատերազմի, արտագաղթի և այլնի հետ: Խոսքը «Լուսավոր Հայաստան» և «Հանրապետություն» կուսակցությունների մասին է»,– ընդգծեց Ա. Հարությունյանը:

Նրա դիտարկմամբ՝ կարևոր է, որ ֆիքսվի օրակարգը, ձևակերպվի խնդիրը, որովհետև պայքարը շատ լուրջ է լինելու:

«Ես ակնկալում էի, որ «Ելք»–ը պառլամենտի ներսում կստեղծեր այդ էներգետիկան, որից ժողովուրդը կոգևորվեր, և այդ էներգետիկան կտարածվեր նաև փողոցում, հետո նորից կփոխանցվեր խորհրդարան և այլն: Բայց հաշվի առնելով խմբակցության ներկա իրավիճակը՝ հարց է առաջանում, այս դեպքում խորհրդարան գնալու իմաստը ո՞րն էր: Չեմ ուզում խորհուրդ տալ Նիկոլ Փաշինյանին, ինքն է իր որոշումն ընդունում, բայց «Ելք»–ից կախվածությունը թուլացնելու համար ճիշտ կլիներ, որ նա որևէ կաղապար չունենալու համար մանդատը վայր դներ: Ես հետևում եմ «Լուսավոր Հայաստանի» ներկայացուցիչների ելույթներին և կարող եմ ասել, որ նրանք անընդհատ փորձում են կապանքների մեջ պահել «Քաղաքացիական պայմանագիր» կուսակցությանը՝ հիշեցնելով պայմանավորվածությունները, հուշագիրը և այլն: Նիկոլ Փաշինյանն, ամեն դեպքում, կաշկանդված է լինելու»,– նշեց մեր զրուցակիցը:

Արամ Հարությունյանի խոսքով՝ աշխարհաքաղաքական հարցեր չպետք է դնել իշխանության առաջ:

«Շատ դեպքերում Ռուսաստանի, ԱՄՆ–ի կամ Եվրոպայի դեմ հարցեր են բերվում: Այդ խնդիրը չպետք է դնենք: Մեր խնդիրը պետք է կոնկրետ լինի: Եթե այսօր Ռուսաստանի դեմ որևէ շարժում է սկսվում, ապա այդ քայլով ի դեմս Ռուսաստանի՝ Սերժ Սարգսյանի համար պաշտպան ենք գտնում: Այսպիսի խնդիր չպետք է լինի, Հայաստանի ինքնիշխանությունը ներսում է որոշվում: Եթե մենք նորմալ ընտրված իշխանություն ունենանք, այդ իշխանությունը Հայաստանի շահերը կպաշտպանի բոլոր ատյաններում: Իսկ եթե մենք ունենանք չընտրված նախագահ, բնական է, որ նա շատ թույլ է լինելու: Որքան էլ պետությունը փոքր լինի, երբ լեգիտիմ նախագահը որևէ հարթակում ներկայացնում է իր ժողովրդին, նրա լեզուն, ինչպես ասում են, ավելի երկար է լինում»,–եզրափակեց կուսակցության ղեկավարը:

Շարունակությունը՝ «Փաստ» օրաթերթի այսօրվա համարում