Պահպանողականները կողմ են Սարգսյանին՝ պաշտոններից չզրկվելու համար. վերևներում մի լավ անկեղծացել են. «Փաստ»

«Փաստ» օրաթերթը գրում է.

Մինչ աջուձախ հնչում են հարցեր վարչապետի ով լինելու հետ կապված, սոցիոլոգ Ահարոն Ադիբեկյանը կազմակերպում է և հրապարակում իր կողմից կատարված սոցհարցման արդյունքները: Եվ դրանք, որքան էլ տարօրինակ հնչի, Սերժ Սարգսյանի օգտին չեն բնավ: Բանն այն է, որ հարցվածների մեծ մասը ցանկանում է Կարեն Կարապետյանին կրկին վարչապետ տեսնել` Հայաստանի հետագա տնտեսական զարգացումը նրա անվան հետ կապելով: Իհարկե, գործող նախագահին վարչապետի պաշտոնում տեսնել ցանկացողների բանակը ևս փոքր չէ, պարզապես մի փոքր զիջում է Կարապետյանին:

Հարցումներն արվել են փորձագետների շրջանում: Հարցմանը մասնակցել են նրանք, ովքեր աշխատելու են վարչապետի հետ՝ պատգամավորական խմբերի ղեկավարները, կուսակցությունների անդամները, լրագրողներ, բիզնես ոլորտի ու իրավապաշտպան կազմակերպությունների ներկայացուցիչներ: Իսկ հանրության կարծիքն այստեղ ոչ մի նշանակություն չի ունեցել:

Գնահատելով ակնկալիքները՝ հարցվածները երկու խմբի են բաժանվել՝ Կարեն Կարապետյանի և Սերժ Սարգսյանի կողմնակիցներ: Դրանց մեծ մասը կողմ է եղել Կարեն Կարապետյանին, որովհետև Սերժ Սարգսյանի նախագահության պայմաններում տնտեսական լուրջ արդյունք չի ապահովվել: Մյուս կողմից էլ վարչապետը ստանալու է ամբողջ գործադիր իշխանությունը և ներկայացնելու է հանրապետությունն այլ միջազգային կառույցներում: Սերժ Սարգսյանի կողմնակիցները գտնում են, որ Հայաստանում ոչ ոք չունի նրա հզորությունը միջազգային կառույցներում:

Միակ ճանաչված մարդն այս պարագայում Սերժ Սարգսյանն է, կարծում են հարցվածների 35%–ը: 45%–ն էլ կողմ է, որ Կարապետյանը մնա՝ հույս ունենալով, որ նա կարող է մի նոր բան բերել ու տնտեսությունը զարգացնել: 15%–ը կարծիք չի հայտնել, մնացածն էլ կասկածի մեջ են: Ինչպես ասում են՝ ժամանակը կգա, կտեսնենք:

«Հիմա կա մի ուրիշ մոտեցում: Պահպանողականները կողմ են Սերժ Սարգսյանի թեկնածությանը, քանի որ իշխանափոխությունը կբերի կադրերի փոփոխություն, վերանշանակում և այլն: Վախենում են, որ կկորցնեն իրենց պաշտոնները, դրա համար ուզում են մնա նույնը: Իսկ նրանք, ովքեր հույս ունեն, որ իշխանության փոփոխմամբ իրենց շանսերը կմեծանան, պաշտոնը բարելավելու կամ պաշտոն ստանալու իմաստով, կողմ են Կարեն Կարապետյանին:

Կարևոր է երեք գործոն՝ միջազգային հարաբերություններում Հայաստանը լավագույնս ներկայացնելու, երկրորդը՝ տնտեսական աճն ապահովելու և երրորդ՝ այնպիսի ներքին քաղաքականություն մշակելու, որ, ինչպես ասում են, ոչ մեկի «խաթրին» չկպնեն»,– «Փաստ»–ի հետ զրույցում պատմեց Ադիբեկյանը:

Հարցին, թե հիմա այս կանխատեսումները կիրականանան, երկրի ամենահայտնի սոցիոլոգը պատասխանեց, թե իրենք չեն կանխատեսում: Իրենց խնդիրն այլ է:

«Ո՞ւմ կնշանակի Հանրապետականը: Առաջին՝ եթե Կարեն Կարապետյանը լինի վարչապետ, իր հետ աշխատողները ինչպես կվերաբերվեն այդ նշանակմանը: Երկրոդ՝ Սերժ Սարգսյանը կմնա, ինչպես կվերաբերվեն: Ինձ այդ վերաբերմունքն է հետաքրքիր: Իշխանական ազդեցության կենտրոններ կան: Կլինի 1, 2, թե 3 կենտրոն, իրենք միմյանց հետ ինչ փոխազդեցություն կունենան և ինչպես կաշխատեն, դա է խնդիրը: Մենք այդ հաշվարկներն ենք անում՝ կառավարման արդյունավետության խնդիրը, որն է ավելի արդյունավետ տրված պայմաններում»,– ասաց մեր զրուցակիցը:

Շարունակությունը՝ «Փաստ» օրաթերթի այսօրվա համարում