Հողային օրենսգրքի փոփոխությունը Հայաստանում ֆեոդալիզմ կհաստատի . «Փաստ»

«Փաստ» օրաթերթը գրում է.

Խորհրդարանը քննարկում է «Հողային օրենսգրքում» լրացումներ կատարելու նախագիծը, համաձայն որի եթե ՀՀ քաղաքացին զրկվում է կամ հրաժարվում է քաղաքացիությունից, մեկ տարի անց կորցնում է սեփականություն հանդիսացող գյուղացիական նշանակության հողատարածքը: Ըստ նախագծի՝ անձը պետք է մեկ տարվա ընթացքում վաճառի իրեն պատկանող հողատարածքը: Եթե չի վաճառում, կատարվում է հարկադիր վաճառք, ստացված գումարը հանձնվում է նախկին սեփականատիրոջը: Հակառակ դեպքում հողատարածքը վերածվում է պետական սեփականության:

Այս նախագիծը դեռ անցած տարեվերջից բուռն քննարկումների արժանացավ: Չնայած նրան, որ իրավունքի շատ մասնագետներ հայտարարեցին, որ խախտվում է սեփականության իրավունքը, օրենսդիրների մի ստվար բանակ փորձեց բացատրել, որ հակառակը՝ օրենքն են փորձում հարմարեցնել Սահմանադրությանը:

Հողային օրենսգրքի նոր փոփոխությունը ոտնահարում է սեփականության իրավունքը, քանի որ հողի սեփականատերը զրկվում է սեփական գույքը հայեցողությամբ տիրապետելու և տնօրինելու իրավունքից: «Փաստ»–ի հետ զրույցում նման տեսակետ հայտնեց փաստաբան Նորիկ Նորիկյանը:

«Իրավունքի կոպտագույն խախտում է: Ստացվում է, որ քաղաքացիությունից հրաժարվելու դեպքում, հարկադրված են լինելու օտարել իրենց սեփականության իրավունքը, հակառակ պարագայում, նրանց սեփականության իրավունքը կդադարեցվի: Դա միջամտություն է անձի սեփականության իրավունքին: Օրինակ՝ քաղաքացին ունի երկու մանկահասակ տղա: Նա հրաժարվում է քաղաքացիությունից: Նա նաև այդ երեխաներին է զրկում իր սեփականությունը ժառանգելու հնարավորությունից»,– նկատեց Նորիկյանը:

Բացի իրավունքի խախտումից, նա այլ խնդիրներ էլ է նկատում օրենսգրքի փոփոխությամբ: Օրենքի ուժով քաղաքացին սեփական գյուղնշանակության հողից կզրկվի. այստեղ կրկին ունևոր խավի բախտը կբերի: Գրոշներով քաղաքացուց հողը կգնեն, և ըստ փաստաբանի՝ Հայաստանում կստեղծվի դասական ֆեոդալիզմ:

«Մտավախություն կա, որ օրենքը ներդնելուց հետո հողերի խոշորացում է տեղի ունենալու և դրանք հայտնվելու են որոշ մարդկանց ձեռքում, ովքեր որոշակի նյութական միջոցներ ունեն: Գումար ունեցողներն են այդ հողերը գնելու, և կգա մի ժամանակ, երբ հողերի խոշորացման անվան տակ ունենալու ենք մի քանի ֆեոդալներ, որոնք տիրապետելու են մեր երկրի հողային ռեսուրսի մեծ մասը: Նյութական հնարավորություններ ունեցողները ձեռք կբերեն այդ հողերը և գյուղում մնացող մարդիկ կսկսեն աշխատել այդ հողերում: Ըստ էության, այդ մարդկանց օրենքի ուժով դարձնելու են ֆեոդալներ: Խնդիր ունենք գյուղատնտեսական նշանակության հողերի մշակման հետ, բայց դա բոլորովին այլ հարթության վրա պետք է տեղավորվի՝ ոչ ի վնաս սեփականատիրոջ»,– շեշտեց նա:

Արմավիրի մարզի Եղեգնուտ համայնքի ղեկավար Ռազմիկ Մարգարյանը երկու ձեռքով է կողմ օրենքին: Այստեղ գյուղատնտեսական նշանակության 300 հեկտար հող չի մշակվում նաև սեփականատիրոջ գյուղից դուրս գտնվելու պատճառով:

«Ովքեր հրաժարվում են քաղաքացիությունից, ինչո՞ւ պետք է հող ունենան, հակասում է Սահմանադրությանը: Այսինքն՝ եթե հող է ստացել գնացել է, պե՞տք է այն մնա, այդ դեպքում թուրքերին էլ հող հատկացնենք: Պետք է նրանց անպայման զրկել սեփականության իրավունքից: Հայրենիքին կարողանում են մի բանով օգտակար լինեն, թող գան օգնեն: Գնան այլ տեղ մնան, երբ այստեղ պատերազմական վիճակն ավարտվի, գան ասեն՝ մեր հողը տվեք»,– պնդեց նա:

Եղեգնուտից շատերն են այս պահին Ռուսաստանի Դաշնությունում բնակվում: Մարգարյանը չի հաշվարկել, թե այդպիսի քանի բնակիչ կա և որքանն են քաղաքացիությունից հրաժարվել:

«Բավականին լուրջ թիվ է: Դրսում ապրելով՝ հողի բիզնես են անում: Զանգում են, ասում՝ հարգելի գյուղապետ, ես իմ հողը վարձակալությամբ տվել եմ ուրիշին, նա հիմա պետք է մշակի, հողին հանկարծ չկպնես»,– ասաց Եղեգնուտի ղեկավարը:

Շարունակությունը՝ «Փաստ» օրաթերթի այսօրվա համարում