Ոմանք ունեցվածքն են թաքցնում, ոմանք էլ ուղղակի հայտարարագիր չեն ներկայացնում. «Փաստ»

«Փաստ» օրաթերթը գրում է.

Գաղտնիք չէ, որ որոշ պաշտոնատար անձինք հայտարարագիր ներկայացնելիս հմտորեն թաքցնում են իրենց սեփականության մի մասը։ Բայց կան և այնպիսիք, ովքեր չեն շտապում ժամանակին ներկայացնել իրենց ունեցվածքի հայտարարագիրը։ Բացառություն չեն նաև նրանք, ովքեր նախազգուշացումից հետո շարունակում են չշտապել։ Նրանց չի շտապեցնում անգամ տուգանքը։

Հուլիսի 25–ի դրությամբ 2017 թ. տարեկան հայտարարագրեր դեռևս չի ներկայացրել 8, իսկ 2018 թ. պաշտոնեական պարտականությունները ստանձնելու հայտարարագիր՝ 19 պաշտոնատար անձ։

Իրենց տարեկան հայտարարագրերը չեն ներկայացրել Գեղարքունիքի մարզի ընդհանուր իրավասության դատարանի նախագահ Աղվան Պետրոսյանը, հյուպատոսներ Սերգեյ և Նիկոլայ Սարկիսովները, Վարդան Սրմաքեշը, ՀՀ քննչական կոմիտեի Երևան քաղաքի քննչական վարչության Երևան քաղաքի Կենտրոն և Նորք-Մարաշ վարչական շրջանների քննչական բաժնի քննիչ Զավեն Դադայանը։ Հայտարարագիր չեն ներկայացրել նաև արդեն պաշտոնաթող Մանվել Դավթյանն ու Ջիվան Նարիմանյանը։

2018 թ. պաշտոնը ստանձնելու հայտարարագիր դեռևս չեն ներկայացրել ՀՀ կրթության և գիտության նախարարի տեղակալ Արևիկ Անափիոսյանը, վարչապետի խորհրդական Արսեն Խառատյանը, խաղաղապահ ուժերի բրիգադի հրամանատար Արտակ Տոնոյանը, պետական վերահսկողական ծառայության պետի տեղակալ Հայկ Սարգսյանը, Վանաձոր քրեակատարողական հիմնարկի պետի տեղակալ Սարգիս Գինոսյանը և այլոք։

Մայիսի 24–ի դրությամբ 2017 թ. տարեկան հայտարարագիրը չէր ներկայացրել 51 պաշտոնատար անձ: Նրանցից 8–ը նախազգուշացումից հետո ներկայացրել է 2017 թ. տարեկան հայտարարագրերը: Հունիսի ընթացքում Բարձրաստիճան պաշտոնատար անձանց էթիկայի հանձնաժողովն ուսումնասիրությունների և վերլուծությունների հիման վրա հարուցել էր վարչական իրավախախտումների վերաբերյալ 66 վարույթ, որոնց արդյունքներով կայացվել էին վարչական տույժ կիրառելու մասին 15 որոշում, գործի վարույթը կարճելու մասին՝ 17 որոշում, 34 գործերի քննություն էլ նախատեսվում էր իրականացնել հուլիսին:

«Հանրային ծառայության մասին» օրենքի 33–րդ հոդվածի համաձայն, հայտարարատու պաշտոնատար անձինք պաշտոնեական պարտականություններն ստանձնելու կամ դադարեցնելու օրվա դրությամբ հայտարարագրերը այդ օրերին հաջորդող 30 օրվա ընթացքում ներկայացնում են Բարձրաստիճան պաշտոնատար անձանց էթիկայի հանձնաժողով: Նշված անձինք տարեկան հայտարարագրեր են ներկայացնում նաև յուրաքանչյուր տարվա դեկտեմբերի 31–ի դրությամբ` ոչ ուշ, քան տվյալ տարվան հաջորդող տարվա մարտի 30–ը։

Վարչական իրավախախտումների վերաբերյալ օրենսգրքի 169,28 հոդվածի համաձայն՝ հայտարարատու պաշտոնատար անձի, ինչպես նաև նրա ընտանիքի կազմի մեջ մտնող անձի կողմից հայտարարագրերը հանձնաժողով տվյալ ժամկետներում չներկայացնելը` առաջացնում է նախազգուշացում, իսկ նախազգուշացման կիրառումից հետո 30 օրվա ընթացքում հայտարարատուի կողմից հայտարարագիրը չներկայացնելը՝ առաջացնում է տուգանքի նշանակում՝ սահմանված նվազագույն աշխատավարձի երկուհարյուրապատիկի չափով, այն է՝ 200 հազար դրամ:

Եթե տուգանքի կիրառումից հետո՝ 30 օրվա ընթացքում, հայտարարատուն դիտավորությամբ չի ներկայացնում հայտարարագիրը, ապա վրա է հասնում քրեական պատասխանատվություն և քրեական օրենսգրքի 314,2 հոդվածի համաձայն հայտարարատուի հանդեպ կարող է կիրառվել տուգանք՝ նվազագույն աշխատավարձի հազարհինգհարյուրապատիկից երկուհազարապատիկի չափով, կամ ազատազրկում՝ առավելագույնը երկու տարի ժամկետով` որոշակի պաշտոններ զբաղեցնելու կամ որոշակի գործունեությամբ զբաղվելու իրավունքից զրկելով` առավելագույնը երեք տարի ժամկետով կամ առանց դրա:

2017թ. տարեկան հայտարարագրերը «նախազգուշացում» վարչական տույժի կիրառելուց հետո 30–օրյա ժամկետում չներկայացնելու համար 8 հայտարարատուի նկատմամբ հարուցվել են նոր վարչական վարույթներ: 4 հայտարարատուների նկատմամբ կիրառվել է «տուգանք» վարչական տույժը, ևս չորս հայտարարատուների նկատմամբ հարուցված վարչական վարույթները դեռևս ընթացքի մեջ են:

Տուգանքի կիրառումից հետո 30–օրյա ժամկետում հայտարարագրեր չներկայացնելու դեպքում Բարձրաստիճան պաշտոնատար անձանց էթիկայի հանձնաժողովը «Հանրային ծառայության մասին» ՀՀ օրենքի 44–րդ հոդվածի հիման վրա վարույթի նյութերը կուղարկի գլխավոր դատախազություն՝ հայտարարագիրը դիտավորությամբ չներկայացնելու առերևույթ հատկանիշներով:

2018 թ. պաշտոնեական պարտականությունները ստանձնելու հայտարարագիր չներկայացրած 19 պաշտոնատար անձանց նկատմամբ հարուցվել են վարչական իրավախախտման վերաբերյալ գործեր:

Վարչական տուգանքի չվճարման դեպքում տուգանքի ձևով վարչական տույժ նշանակելու մասին որոշումը ենթակա է հարկադիր կատարման հետևյալ կարգով՝ վարչական ակտն ուժի մեջ մտնելու օրվանից 2 ամսվա ընթացքում չբողոքարկելու դեպքում այն դառնում է անբողոքարկելի և դրամական պահանջները ներկայացվում են հարկադիր կատարման՝ վարչական ակտն անբողոքարկելի դառնալուց, իսկ վարչական ակտի կատարումը հետաձգելու կամ տարաժամկետելու դեպքում՝ հետաձգելու կամ տարաժամկետելու ժամկետի ավարտից հետո՝ եռամսյա ժամկետում:

Շարունակությունը՝ «Փաստ» օրաթերթի այսօրվա համարում