Ի՞նչ է անում ԿՄԽԿ-ն սյունեցի տղաներին Ադրբեջանից վերադարձնելու համար

Այսօր ՀՀ ԱԱԾ-ն հաղորդագրություն տարածեց, ըստ որի, Սյունիքի մարզի երկու անչափահաս բնակիչներ մոլորվել են և հայտնվել Ադրբեջանի տարածքում:

Ստացված տվյալների համաձայն՝ ՀՀ Սյունիքի մարզի Տեղ համայնքի բնակիչներ Կարեն Արմենի Ջհանգիրյանը (ծնված 27.06.2007թ.) և Անդրեյ Արմենի Գյագունցը (ծնված 13.01.2008թ.) 2025 թվականի հունիսի 6-ին՝ ժամը 01:20-ի սահմաններում, Սյունիքի մարզի Արավուս գյուղի հարակից հատվածում՝ տեղանքում մոլորվելու հետևանքով հայտնվել են Ադրբեջանի տարածքում։
Ձեռնարկվում են անհրաժեշտ բոլոր միջոցները՝ քաղաքացիների գտնվելու վայրը պարզելու և նրանց անվտանգ վերադարձն ապահովելու ուղղությամբ։

Դեպքի առնչությամբ գյուղում տարբեր վարկածներ են շրջանառվում, որոնց մասին MediaHub-ն արդեն գրել է։

Քիչ առաջ համայնքից մեզ հետ զրույցում ասացին, որ ԿՄԽԿ-ն սկսել է բանակցությունները տղաներին վերադարձնելու հարցով։
Կազմակերպությունից, սակայն, հերքեցին մեզ հասած լուրերը։ 

Կարմիր խաչի միջազգային կազմակերպության հաղորդակցման ծրագրերի ղեկավար Զառա Ամատունին MediaHub-ին ասաց, որ բանակցությունների համար ԿՄԽԿ պատվիրակություն պիտի ձևավորվի թե՛ հայկական, թե՛ ադրբեջանական կողմում, սակայն այս պահին նման բան չկա։

Թե ինչ ընթացակարգ է գործում, արդյո՞ք կան սահմանված ժամկետներ պատվիրակություններ ձևավորելու համար, Ամատունին պատասխանեց՝ ոչ։

«Այս պահին մենք սպասում ենք իշխանության գործողություններին։ Ինչպես գիտեք՝ Ադրբեջանում փակվում է ԿԽՄԿ գրասենյակը, և այս առումով մեր աշխատանքը բավականին բարդացել է։ Մենք հիմա սպասում ենք իշխանության քայլերին»,- նշեց Ամատունին։

ԱԱԾ-ից հրաժարվում են որևէ նոր մեկնաբանույթուն տալ՝ հորդորելով բավարարվել արդեն իսկ տարածված հաղորդագրությամբ։

Նարե Գնունի