«Haqqin.az»-ը սենսացիոն տեսահոլովակ է տարածել համացանցում. հայ լրագրողները բացահայտ աշխատում են ադրբեջանցիների վրա (տեսանյութ)

«Haqqin.az»-ը սենսացիոն տեսահոլովակ է տարածել համացանցում, որի նպատակն է ցույց տալ, որ Սերժ Սարգսյանը Հայաստանում ունի զրոյական վարկանիշ: Այն, որ Սերժ Սարգսյանն ունի լեգիտիմության լրջագույն խնդիր Հայաստանում ակներև է: Սակայն երկրում բարոյահոգեբանական մթնոլորտը հասել է այն աստիճանի, որ հայ լրագրողներն ու բլոգերները սկսել են բացահայտ աշխատել ադրբեջանցիների համար:Փաստը՝ վերը նշված տեսանյությն է, բայց պետք է նշել, որ Հայաստանում այսօրվա խայտառակ մթնոլորտի պատճառը հայաստանցիները չեն:

Եթե մենք անցնակցում ենք այսպիսի ընտրություններ, որը նմանվում է փաստացի ձայների բորսային, որտեղ ձայների 90 տոկոսը, բառիս բուն իմաստով, գնվում է, ապա մենք ինչու՞ ենք զարմանում, որ հայ բլոգերը կարող է աշխատել ադրբեջանցու համար, այն էլ բացահայտորեն: Ոմանք մեղքը գցում են ժողովուրդի վրա, որ ժողովուրդն է ծախվել՝ ի՞նչ անի «խեղճ» իշխանությունը, սակայն ժողովուրդը ծախվում է այն ժամանակ, երբ տեսնում է, որ ծախված է նրա վերնախավի 90 տոկոսը: Երեկվա վերջին նշանակումը՝ փայլուն օրինակ, երբ 2008 թվականին Լևոն Տեր-Պետրոսյանի շարժման շտաբի պետը, որի բառապաշարի մեջ ներկայիս իշխանությունները համեմատվում էին մոնղոլ-թաթարների հետ, նույն այսօրվա իշխանության կողմից նշանակվում է դեսպան: Սա, ինչպես ասում են, վերջն է:

Հայաստանում ընթանում է առաջին հայացքից դժվար երևացող, սակայն պետականության փլուզման դանդաղ գործընթաց: Մենք մեր պատմության մեջ նման գործընթացներ շատ ենք ունեցել, բայց այդ պատմությունից, ցավոք, այդպես էլ ոչ մի դաս չքաղեցինք: Սա է իրականությունը:

Հ. Գ. Հետաքրքրական է, որ հայ բլոգերի տեսանյութը ռուսերեն լեզվով է: Դա պետք է ադրբեջանի և միջազգային հանրության համար, ինչպես նաև մյուս տեսանյութերը, որոնք տարածել է ադրբեջանական «Mega Youtube» ալիքը:

Արտակ Հակոբյան