Երկու տարբեր իրականություններ կամ այսօր մեր ժողովուրդը հին թղթադրամներով էլ յոլա կգնա, միայն թե այդ թղթադրամները լինեն նրա ձեռքին. «Փաստ»

«Փաստ» օրաթերթը գրում է.

Երբ կարդում ես մեր պետական կառույցների, գերատեսչությունների հաղորդագրությունները, կարծես գտնվում ես բոլորովին մեկ այլ երկրում: Քանզի, ինչ այնտեղ գրված է լինում, գրվածքի ոգին, ասելիքի տրամաբանությունն ու հիմնավորվածությունը համարյա կապ չեն ունենում այն իրականության հետ, որի մեջ ապրում ենք:

Երկու տարբեր երկրներ են: Մեկը` վերևում: Իր պրոբլեմներով, իր հետաքրքրություններով ու շահագրգռություններով:

Մյուսը` ներքևում: Սովորական մարդիկ, որոնց համար բոլորովին անհասկանալի են վերևների մտահոգությունները: Ու բոլորովին այլ դարդ ու ցավով են ապրում:

Հիմա տեսեք` մեր երկրի Կենտրոնական բանկը հայտարարություն է տարածել երրորդ սերնդի թղթադրամների թողարկման մասին:

Եվ ո՞րն է էականը. հաղորդագրության մեջ անվերջ հիշատակվում է «ավանդույթ» բառը` ըստ ձևավորված ավանդույթի, ավանդույթի համաձայն: Եվ գործընթացը, որի վերաբերյալ հիշատակվում է ավանդույթ հասկացությունը, ընդամենը 25 տարվա պատմություն ունի: Ոչ. դեռ 25–ն էլ ամբողջությամբ չի լրացել:

Իսկ այն, ինչի մասին խոսվում է` թղթադրամների թողարկումը, եղել է ընդամենը երկու անգամ: Փաստորեն այս երկու անգամների մեջ ձևավորվել է այդքան ամուր ավանդույթը, ավելի ճիշտ` ավանդույթները, որոնք դուրս են եկել արդեն մեր երկրի սահմաններից ու, իրենց բառերն են` «օրինակելի և ուսուցանելի են դարձել նաև միջազգային մակարդակում»:

Չգիտես ինչո՞ւ այս բառերը ընթերցելիս «մեղմացուցիչ դեպք հանցանացի» նշույլներ ես տեսնում տեքստի մեջ: Ասես ամեն կերպ փորձում են հիմնավորել, շեշտել գործի անհրաժեշտությունը:

Ոճը` մի կողմ, իհարկե. հիմա` բուն երևույթի մասին:

Մեր երկրի տնտեսական պրոբլեմները, պարզվում է, սկսվում են նրանից, որ մեր ձեռքին եղած թղթադրամները էլ ավելի երկարակյաց ու դիմացկուն չեն և չունեն պաշտպանվածության էլ ավելի բարձր հատկանիշներ:

Եթե վերացվեն թիվ մեկ նշանակության այս խնդիրները, պատկերացնո՞ւմ եք, թե մեր տնտեսությունը զարգացման ինչպիսի ցատկ կկատարի, ու մեր ժողովուրդը` հասարակ ժողովուրդն էլ ինչքան լավ կապրի` դուրս գալով աղքատության ճիրանններից:

Այստեղ են ասել` քո պրոբլեմը ի՛մը լիներ…

Հիմա արդեն պատկերացրեք, թե այս խեղճ բյուջեով խեղճ երկրի վրա որքա՞ն է նստելու թղթադրամային այս շքեղություն–շռայլությունը: «Թղթադրամների արտադրության համար հայտարարվել է միջազգային մրցույթ եվրոպական ճանաչված դրամահատարանների մասնակցությամբ»: Բա՞…

Նաև` «ՀՀ 3–րդ սերնդի թղթադրամների էսքիզների որոշման նպատակով Կենտրոնական բանկի կողմից հայտարարվելու է բաց մրցույթ»:

Այսպիսի բաներ:

Հիմա մնում է մի բան ասել` եղբայրնե՛ր, իջեք ձեր ոսկե ապարանքներից ու տեսեք ձեր ղեկավարած երկրի իրական վիճակը: Այստեղ ապրող ժողովուրդը այլ բանի կարիք ունի, այլ բան է տենչում ամեն օր: Նրա կյանքը դարձել է համատարած պայքար մի կտոր հացի համար, որը պետք է հասցնի իր երեխային: Նրա կյանքը դարձել է համընդհանուր կռիվ արդարության համար. ամեն օր դատարանների դռներն է ընկած` մինչ կհասնի ձեր խոստացած արդար Հայաստանին:

Դուք ա՛յս մասին մտածեք, և ոչ թե մտածեք, թե հերթական փողաբեր գործը ինչպես կպցնեք, ու դրան տաք արտաքին գեղեցիկ փաթեթավորում` խոսելով բարձր–բարձր բաներից ու էսթետիկ անհրաժեշտություններից:

Այսօր մեր ժողովուրդը հին թղթադրամներով էլ յոլա կգնա, միայն թե այդ թղթադրամները լինեն նրա ձեռքին:

Շարունակությունը` «Փաստ» օրաթերթի այսօրվա համարում