Ադրբեջանը փորձում է վհատություն սերմանել Արցախում. Արցախի ԱԳ նախարար
Շուշիի մոտակա խաչմերուկում ադրբեջանցու կրակոցներից վիրավորված արցախի երեք քաղաքացիներից 31-ամյա Գևորգ Մելքումյանի վիճակը բժիշկները գնահատում են կայուն ծանր։ Նա երեկ վիրահատվել է, հրազենային վիրավորում էր ստացել պարանոցի շրջանում և այսօր արդեն ինքնուրույն է շնչում։ Արցախի առողջապահության նախարարությունից տեղեկացնում են, որ մյուս երկու վիրավորների՝ 41-ամյա Արմեն Սարգսյանի ու 43-ամյա Գագիկ Ղազարյանի վիճակը միջին ծանրության է։
Երեկ կեսօրին ադրբեջանցի զինծառայողը մոտեցել է շինաշխատանք կատարող 4 արցախցիների, կրակել նրանց ուղղութամբ, 22 -ամյա Մարտիկ Երեմյանը գլխի հրազենային վիրավորում է ստացել, մահացել տեղում։ Արցախի քննչական կոմիտեում քրեական գործ է հարուցվել ահաբեկչության հոդվածով։
«Ադրբեջանի զինված ուժերի` գործով դեռևս չպարզված զինծառայողը Ադրբեջանի զինված ուժերի վերահսկողության տակ անցած տարածքից անցնելով Արցախի Շուշի-Բերձոր ավտոճանապարհի «Շուշիի տակ» կոչվող տեղանք, Արցախի բնակչությանն ահաբեկելու, նրանց մոտ վախի ու սարսափի մթնոլորտ ձևավորելու ձգտումով, ազգային, կրոնական ատելության շարժառիթով, ապօրինաբար երկու և ավելի անձանց կյանքից զրկելու ուղղակի դիտավորությամբ, իր մոտ պահվող հրազենով կրակոցներ է արձակել ջրատար խողովակի վերանորոգում իրականացնող անձանց ուղղությամբ», - ասված է հաղորդագրությունում։
Չորս արցախցիներից երկուսը էներգամատակարարման աշխատանք էին կատարում Արցախի տարածքում, երկուսը՝ ջրամատակարարման։ Սպանված Մարտիկ Երեմյանը Արցախի ջրմուղի աշխատակից էր։
«Էդ էն ճանապարհն ա, որով օրեկան հարյուր հատ ավտո ա գնում Հայաստան ու հետ գալիս։ Մենք էլ ամիսներով ընտեղ աշխատել ենք», - «Ազատության» հետ զրույցում ասաց Արցախի «Ջրմուղ կոյուղի» ՓԲԸ տնօրեն Գագիկ Պողոսյանը։
Նրա խոսքով, տղաները վթարի վերացման աշխատանք էին անում, վթարվել էր ռուս խաղաղապահների դիրքերը սնուցող խողովակը, երբ նրանց է մոտեցել զինված ադրբեջանցին. - «Մոտեցել ա, ասել ա՝ ի՞նչ եք անում, մեր տղեքը պատասխանել են, որ՝ վթարավերացման աշխատանքներ ենք անում, ու միանգամից սկսել ա կրակելը»։
Կրակել է մեկ-երկու մետր հեռավորությունից։
Ադրբեջանի արտգործնախարարության լրատվության պատասխանատու Լեյլա Աբդուլաևան է դեպքից 26 ժամ անց արձագանքել տեղի ունեցածին։ Նա փաստորեն չի հերքել, որ ադրբեջանցի զինծառայողը կրակել է արցախցիների ուղղությամբ, այդ ամենը հիմնավորել է նրանով, որ սովորաբար շինաշխատանքներ կատարվում են ռուս խաղաղապահների իմացությամբ և ուղեկցությամբ։ Այս անգամ այդպես չի եղել, և դա, ըստ Աբդուլաևայի, լուրջ հարցեր է առաջացնում։
«Շուշիում Ադրբեջանի նախագահի ու այլ պետական պաշտոնյաների մասնակցությամբ միջոցառում էր անցկացվում, և նման դեպքպերում անվտանգության խիստ միջոցառումներ են ձեռնարկվում», - քաղաքացիական անձանց ուղղությամբ կրակոցներն այսպես է հիմնավորել Ադրբեջանի արտգործնախարարության պաշտոնյան։
Արցախի արտաքին գործերի նախարար Դավիթ Բաբայանը Շուշիի մոտ տեղի ունեցածը որակում է ֆաշիզմ ու ահաբեկչություն , որն իրականացվել է Ադրբեջանի բարձրագույն ղեկավարության ցուցումով. - «Այդ օրը Շուշիում էր Ալիևը, նրա կինը, Թուրքիայի պաշտպանության նախարարը, Թուրքիայի, Ադրբեջանի բարձրաստիճան պաշտոնյաներ, Ադրբեջանի գրեթե ողջ ղեկավարությունը, և այսպիսի նվերը այս օրվա կապակցությամբ, բնական է, լրիվությամբ տեղավորվում է այն գաղափարախոսության, տրամաբանության մեջ, որը իրականացնում է պաշտոնական Բաքուն»։
Նախարար Բաբայանը համոզված է, որ Ադրբեջանը գործում է սառը հաշվարկով, զուգահեռ զգացմունքայնության հետ է խաղում. Արցախը Հայաստանին կապող միակ ճանապարհի վրա է տեղի ունեցել այս արյունոտ դեպքը։
«Փորձում են վհատություն սերմանել Արցախում», - ասում է Դավիթ Բաբաբյանը։ - «Որպեսզի մարդիկ գերադասեն դուրս գալ Արցախից, ովքեր ուզում են վերադառնալ՝ չգան։ Որպեսզի մեր կապերը արտաքին աշխարհի հետ խարխլվի, մարդիկ և տարբեր կազմակերպություններ չներգրավվեն Արցախի շենացման գործին, ներդրումներ չանեն։ Եվ բնական է, նաև հարված է ռուս խաղաղապահ առաքելությանը»։
Ռուսաստանի պաշտպանության նախարարության կայքէջի խաղաղապահ առաքելությանը վերաբերող լրահոսում երեկ տեղի ունեցածի մասին որևէ արձագանք, տեղեկություն առայժմ չկա։
Ինչպե՞ս է ադրբեջանցին գնդակահարում հայ քաղաքացիական բնակիչներին ռուս խաղաղապահների վերահսկողության գոտում։ Արցախի արտգործնախարարի խոսքով, Ադրբեջանի ու Թուրքիայի նպատակներից է նաև իրենց մոռացնել տալն ու Ռուսաստանի մասին հիշեցնելը. - «Մի կասկածեք, որ տարբեր խողովակներով տարբեր տեղեր այսպիսի տեղեկատվությունը չի գնացել, և դա վատ է ընդունվել։ Պարզապես պետք է հասկանանք, որ Արցախի ճակատագիրն է դրված սեղանին, պետք է, եթե հայրենասիրություն կա, դա հասկացվի։ Եվ ի՞նչ կապ ունի ռուս խաղաղապահ առաքելությունը։ Հասկանալի է, չէ՞, որ դա հարված է նաև իրենց։ Հիմա ահաբեկիչը կանգնած կրակում է, կամ գալիս է սպանում է մարդկանց... Իհարկե՝ հասկանալով, հաշվարկ անելով նաև դրա վրա, որ մեր եղբայրությունը խարխլի։ Հիմա ինչ եք կարծում, եթե ռուս խաղաղապահ առաքելությունը այստեղ չլինի, Արցախը մնալո՞ւ է»։
Երեկ Հայաստանի արտաքին գերատեսչությունն էր դատապարտող հայտարարություն տարածել. - «Ադրբեջանի բարձրագույն ղեկավարության շարունակական հայատյաց հռետորաբանությունը և հրադադարի ռեժիմի խախտմամբ կրկնվող միջադեպերը բացահայտորեն ի ցույց են դնում Հայաստանի և հայ ժողովրդի հետ հարաբերությունները կարգավորելու վերաբերյալ պաշտոնական Բաքվի կողմից հնչող հայտարարությունների սին բնույթը»։
Լրագրողի հարցին, թե արդյոք համարժեք է Հայաստանի խաղաղության օրակարգը, երբ Ադրբեջանը կրակում է, Սիմոնյանն արձագանքում է՝ համարժեք է. - «Մեր պատասխանը ադեկվատ է։ Մենք չպետք է պատերազմ հրահրենք և պատերազմ սկսենք, որովհետև մենք երբևիցե դա չենք արել, նույնիսկ արցախյան առաջին պատերազմից հետո»։
Ընդդիմադիր «Պատիվ ունեմ» խմբակցության անդամ Թագուհի Թովմասյանը միայն դատապարելը բավարար չի համարում. - «Հայաստանը եթե չի իրականացնում իր ագրեսիվ քաղաքական քաղաքականությունը, մենք ի պատասխան ստանում ենք այդպիսի լղոզված վերաբերմունք, որ եթե նույնիսկ դուք չեք կարևորում նման իրադարձությունների դատապարտումը, հետևաբար ի՞նչ եք ուզում աշխարհից։ Սա շատ վատ մոտեցում է, մենք պետք է վերանայենք ու փոխենք այս մոտեցումը։ Եվ միաժամանակ մենք պետք է պահանջատեր լինենք։ Ռուս խաղաղապահները կանգնած՝ հայ են սպանում ադրբեջանցիները... Ի՞նչ է անում ռուսական կողմը»։
«Հային մատաղ են անում իրենց հաղթանակի օրը». - երեկ, ըստ ընդդիմադիր պատգամավորի, սա է տեղի ունեցել։
AFI назвал ленту продюсера Сева Оганяна одним из лучших фильмов года
Требование — прекратить нарушение фундаментальных прав граждан Республики Армения: «Всеармянский фро...
Обеспокоенная Европа поднимает голос: авторитетные международные деятели предупреждают: «в Армении у...
На что указывают позорные цифры? «Паст»
Юнибанк выпустил новый транш драмовых бессрочных облигаций со ставкой 13,75% годовых
Обещают «сожрать» право граждан Армении на свободный выбор: «Паст»
Пашинян готов изменить Конституцию Армении в угоду мирному соглашению с Азербайджаном
Пашинян перешёл опасную границу: Российская епархия — объединённый центр Святой Армянской Апостольск...
Сегодня - премьер-министр, завтра - бывший, а Церковь вечна: «Паст»
Итальянский городок в Тоскане платит $30 000 за переезд — с одним условием
