Արարատի մարզի թիվ 13 տարածքային ընտրական հանձնաժողովի նախագահ Հովիկ Գասպարյանի կարծիքով` քվեաթերթիկը գրպանը դնելը օրենքի խախտում չէ. «Փաստ»
«Փաստ» օրաթերթը գրում է.
Խորհրդարանական ընտրությունների օրը՝ ապրիլի 2–ին շրջելով Արարատի մարզի մի քանի համայնքներում տարբեր պատկերների ականատես եղանք: Ու եթե մի գյուղում ընդդիմություն–իշխանություն «համագործակցությունը» բարձր մակարդակի վրա էր և ընտրական պրոցեսի ժամանակ առանձնապես լարվածություն չկար, ապա նույնը չի կարելի ասել մարզի այլ գյուղերի և Արտաշատ քաղաքի տարբեր ընտրատեղամասերի մասին:
Գոռավան համայնքում, որտեղ տեղակայված էր 13/39 ընտրատեղամասը, ընտրությունները բավականին լարված մթնոլորտում էին ընթանում: Հիմնական լարվածությունը ՀՀԿ և «Ծառուկյան» դաշինքի վստահված անձերի միջև էր, որին նաև մենք ականատես եղանք: Լարվածությունը պայմանավորված էր նրանով, որ դաշինքի վստահված անձինք մի քանի խախտումներ էին նկատել և պահանջել էին, որ հանձնաժողովի նախագահն ու անդամները դրանք վերացնեն:
Խախտումներից մեկի ժամանակ ընտրողներին քվեաթերթիկներ տրամադրող հանձնաժողովի անդամ Օֆիկ Հովհաննիսյանը 6 համարի քվեաթերթիկը դրել է 1–ի փոխարեն և ընտրողներին ուղղորդել, որ ՀՀԿ–ին ընտրեն: Ընտրատեղամասում նաև արձանագրվել է քվեաթերթիկ դուրս հանելու փորձ: Դրանից բացի թե՛ ընտրատեղամասի դռան մոտ և թե՛ շրջակայքում բավականին թվով մարդկանց կուտակումներ կային:
Գոռավան համայնքի ղեկավար Արսեն Բազիկյանը, ով նաև ՀՀԿ–ի վստահված անձանցից էր, «Փաստի» հետ զրույցում ասաց, որ ինքը տեղյակ է, որ հանձնաժողովի անդամը տարբեր հերթականությամբ է դրել քվեաթերթիկները և թեև իր կարծիքով դրա մեջ որևէ վատ բան չկա, բայց զգուշացրել է հանձնաժողովի անդամին, որ նման բան չանի:
Թիվ 13/39 ընտրատեղամասի հանձնաժողովի նախագահ Նարինե Օհանյանը խոսելով ընտրատեղամասից դուրս մարդկանց կուտակումների մասին` նշեց, որ քվեախցիկների քիչ քանակի պատճառով են կուտակումներն առաջացել: Ընտրությունը սկսվելուց մի քանի ժամ հետո, ավելացվել է ևս մեկ քվեախցիկ: Ու չնայած, դրանից հետո հերթը մի քիչ պակասել է, սակայն իր համար էլ հասկանալի չէ, թե ինչու են ընտրողներն այդքան դժվար կողմնորոշվում:
«Քաղաքացին մոտենում է քվեախցիկին ու ժամերով դուրս չի գալիս: Մարդիկ տեղեկացված չեն, թե ինչպես պետք է ընտրություն կատարեն: Ինչ վերաբերում է ընտրատեղամասից քվեաթերթիկ դուրս հանելու դեպքին, ապա դա նույնպես արձանագրվել է: Ես մոտեցել եմ և նրանից պահանջել եմ, որ նա քվեախցիկում թողնի իր մոտ եղած քվեաթերթիկը»,– ասաց հանձնաժողովի նախագահը:
«Ծառուկյան» դաշինքի վստահված անձը պնդում էր նաև, որ գյուղապետի որդին՝ Գևորգ Բազիկյանը, «ՕՐՕ» դաշինքի վստահված անձն է, բայց աշխատում է ՀՀԿ–ի համար, իսկ համայնքի ղեկավարը ընտրողի հետ դուրս է գալիս ընտրատեղամասից, ապա հետ ուղարկում ընտրության: Ի դեպ, համայնքի ղեկավարն ամեն կերպ փորձում էր դուրս հրավիրել նաև մեզ` նշելով, որ խանգարում ենք իրենց «աշխատանքին»:
Երբ դեռ թիվ 18/39 ընտրատեղամասում էինք, այնտեղ եկավ նաև Արարատի մարզի թիվ 13 տարածքային ընտրական հանձնաժողովի նախագահ Հովիկ Գասպարյանը: «Փաստի» հետ զրույցում նա ասաց, որ նոր է եկել ընտրատեղամաս և դեռևս չի ծանոթացել, թե այդտեղ ինչ խախտումներ են արձանագրվել:
«Բայց դուք էլ գիտեք, ես էլ գիտեմ, որ եթե մարդը գալիս է ընտրատեղամաս, ապա արդեն իսկ կողմնորոշված է գալիս: Այնպես, որ այդ բյուլետենը առաջինը կդրվի, վերջինը կդրվի, թե որը կդրվի դա էական չեմ համարում: Եթե դիտորդը նկատում է, որ դա կարող է խախտել ընտրողի իրավունքները, ապա խնդիր չկա, թող հերթականությամբ դասավորեն»,– ասաց հանձնաժողովի նախագահը:
Նա նաև նշեց, որ այս անգամ ընտրությունը ավելի դժվար է, քանի որ քվեարկության ընթացքը երկու պրոցեսով ավելացել է՝ մեկը տեխնիկական սարքավորման միջոցով անձի ինքնության ճշտումն է, մյուսը՝ դրոշմանիշի փակցնելու հանգամանքը: Նրա խոսքով դա է պատճառը, որ ընտրական պրոցեսը դանդաղ է ընթանում: Պատասխանելով հարցին, թե տեղյակ է, որ ընտրատեղամասից քվեաթերթիկ են փորձել դուրս հանել, տարածքային հանձնաժողովի անդամը հարցից զարմացած՝ հարցով պատասխանեց:
«Ինչո՞ւ պետք է ընտրողը նման քայլի գնա, քանի որ քվեախցերում լիքը քվեաթերթիկներ կան: Իհարկե ճիշտ չի ընտրատեղամասից քվեաթերթիկ հանելը, բայց մարդ է, կարող է մոռացել է և չընտրված քվեաթերթիկը դրել է գրպանը և ուզել է դուրս գալ: Որևէ մեկը իրավունք չունի այդ մարդուն խուզարկելու: Ես անձամբ չեմ տեսել, նման բան, բայց կարելի է հասկանալ, թե ինչի են նման բան արել: Բայց օրենքում որևէ տեղ չի ամրագրված, որ եթե ընտրողը մոռացել է և քվեաթերթիկը դրել է գրպանը, ապա ինչ–որ խախտում է կատարել»,– ասաց Հ. Գասպարյանը:
Շարունակությունը` «Փաստ» օրաթերթի այսօրվա համարում:
Размик Марукян стал обладателем бронзовой медали XV Международного конкурса артистов балета
Вопрос об аресте Чалабяна дошел до Европейского парламента: «Паст»
Почему стало модно «отчитывать» оппозицию, и чего на самом деле ожидает общество? «Паст»
Артем Оганов получил международную госпремию Китая в области науки и техники — лично от Си Цзиньпиня
Небольшой французский уголок в Раздане при сотрудничестве с Конверс МСБ
IDBank предупреждает о мошеннических звонках от имени пенсионных фондов
Ложная дилемма мандатов: почему тема парламентского бойкота оппозиции - пустая повестка дня? «Паст»
Армения заинтересована в полноценном участии в ЕАЭС: Пашинян
Глава МИД Иордании: Подписание мирного соглашения между Арменией и Азербайджаном близко
Зачем Пашинян полетел в Россию?․ Аршак Карапетян
