Նորայր Սարգսյանի հինգ հողամասերն ու տրակտորը. «Փաստ»

«Փաստ» օրաթերթը գրում է.

Նախորդ տարի Եղվարդի քաղաքապետի պաշտոնում վերընտրված Նորայր Սարգսյանը թվով 8 անշարժ գույք ունի: Ինչպես տեղեկանում ենք քաղաքապետի գույքի և եկամուտների հայտարարագրից՝ Սարգսյանը մոտ 14 հեկտար մակերեսով գյուղատնտեսական նշանակության հողամասեր ունի:
Եղվարդի քաղաքապետը հայտարարագրել է գյուղատնտեսական նշանակության 5 հողամաս, որոնց ընդհանուր մակերեսը կազմում է ավելի քան 13,5 հեկտար:
Հայտարարագրից նաև տեղեկանում ենք, որ Նորայր Սարգսյանը նաև գյուղատնտեսական նշանակության արտադրական տարածք ունի՝ 1,25 հեկտար մակերեսով, ինչպես նաև երկու առանձնատուն՝ իրենց հողամասերով: Այս ողջ անշարժ գույքը Սարգսյանին է պատկանում սեփականության և համատեղ սեփականության իրավունքով և գտնվում Եղվարդ քաղաքում:
Նորայր Սարգսյանը հայտարարագրել է նաև 1982 թ. արտադրության ՄՏԶ–82 մակնիշի տրակտոր: Նախորդ տարվա հունվարի 1–ից մինչ քաղաքապետի պաշտոնը ստանձնելու օրն ընկած ժամանակահատվածում Եղվարդի քաղաքապետի 10 ամսվա աշխատավարձը կազմել է 4 միլիոն 823 հազար դրամ:
Նորայր Սարգսյանը մասնագիտությամբ մեխանիկ–մեքենաշինարար է, աշխատել է տեխնիկ, փականագործ, ավագ ինժեներ, եղել կրտսեր գիտաշխատող: 1992–1997 թթ. եղել է Եղվարդի գյուղխորհրդի նախագահի տեղակալը, այնուհետև՝ Եղվարդի քաղաքապետի տեղակալը: Եղվարդի քաղաքապետի պաշտոնն է զբաղեցնում արդեն 18 տարի:

Շարունակությունը` «Փաստ» օրաթերթի այսօրվա համարում: