Մարտյան ընտրությունները վեց լրագրո՞ղ կլուսաբանի. «Փաստ»

«Փաստ» օրաթերթը գրում է.

Կենտրոնական ընտրական հանձնաժողովի կայքում հրապարակվել է մարտի 11–ին հայաստանյան մի շարք համայնքներում կայանալիք հերթական և արտահերթ ՏԻՄ ընտրություններին հավատարմագրված ԶԼՄ–ների ցանկը:

2018 թ. մարտի 11–ին տեղական ինքնակառավարման ընտրությունների քվեարկության օրն ընտրությունների և քվեարկության վերաբերյալ լուսաբանում իրականացնող ԶԼՄ ներկայացուցիչները վեցն են՝ բոլորն էլ հեռուստաընկերություններից: Այդ վեց ներկայացուցչից երեքը «Շանթի» լրագրողներ են, երեքն էլ՝ «Արմնյուզի»:

Թե ինչով է պայմանավորված այս տարվա ՏԻՄ ընտրությունների նկատմամբ պասիվ հետաքրքրությունը, դժվար է կռահել:

Ի դեպ, նշենք, որ ընտրատեղամասերում լուսաբանում իրականացնելու համար հավատարմագրվելու դիմումը և ԶԼՄ ներկայացուցիչների ցուցակը Կենտրոնական ընտրական հանձնաժողով պետք է ներկայացվեր 2017 թ. դեկտեմբերի 26–ից այս տարվա փետրվարի 24–ն ընկած ժամանակահատվածում:

Հավելենք, որ համայնքի ղեկավարի թեկնածուներից ոմանք արդեն հասցրել են կամ հետ վերցնել իրենց փաստաթղթերը, կամ էլ՝ ինքնաբացարկի մասին հայտարարել:

Մասնավորապես, ինքնաբացարկ է հայտարարել համայնքի ղեկավարի 11 թեկնածու, իսկ փաստաթղթերը հետ վերցնելու մեկ դեպք է գրանցվել: Ի դեպ վերջինս Արարատի մարզի Դարբնիկ համայնքի ղեկավարի թեկնածուն էր՝ Սմբաթ Ավետիսյանը, ով Հանրապետական կուսակցությունից է: Նրա՝ փաստաթղթերը հետ վերցնելով և ևս մեկ թեկնածուի՝ Ռաֆիկ Վիրաբյանի ինքնաբացարկի «շնորհիվ» մյուս ՀՀԿ–ական, համայնքի գործող ղեկավար Դավիթ Գզիրյանի շանսերը կկրկնապատկվեն: Իհարկե, այս դեպքում նրա համագյուղացիների քվեաթերթիկներին նշված կլինեն դեմ կամ կողմ տարբերակներ, սակայն վերընտրվելու խնդիրն այդ թեկնածուն ավելի հեշտ կլուծի:

Շարունակությունը՝ «Փաստ» օրաթերթի այսօրվա համարում