Դեղ արտադրողների ու ներկրողների դժգոհության պատճառներն անհասկանալի են. «Փաստ»

«Փաստ» օրաթերթը գրում է.

Հայաստանի դեղ արտադրողների և ներմուծողների միության նախագահ Սամվել Զաքարյանը լրագրողների հետ հանդիպման ժամանակ ասել է, որ Առողջապահության նախարարությունն իրականությունից կտրված և մասնավոր հատվածի՝ դեղ արտադրողների, դեղատների հետ հաշվի չի նստում: Նրա վրդովմունքի պատճառը դեղերի դեղատոմսով բաց թողնելու նոր կարգն էր: Նա տեսակետ է հայտնել, թե Վրաստանին հարստացնելու պրոցեսը գնալով զարգանում է:

«Արդեն տարիներ շարունակ ահազանգում ենք, որ դեղերի 40%–ը «կոնտրաբանդայի» ձևով բերվում է Վրաստանից, որովհետև այնտեղ 20 տոկոս ԱԱՀ չկա և 2–3 անգամ էժան է: Ամեն մի տաքսիստ, ամեն մի տուրիստ մտնում դեղեր է առնում և գալիս է Հայաստան»,– ասել է Ս. Զաքարյանը:

Նա նաև նշել է, որ պարբերաբար առաջարկում են կառավարությանը Հայաստանում դեղերի վրա կիրառվող 20% ԱԱՀ–ն հանել, սակայն, ըստ նրա, հարցը մնում է օդում կախված:

Հիշեցնենք, որ օրերս ՊԵԿ նախագահի առաջին տեղակալ Վախթանգ Միրումյանը լրագրողների հետ հանդիպման ժամանակ ասել էր, որ նոր «Հարկային օրենսգրքով» ԱԱՀ–ն ոչ միայն ներկրողներին է վերադարձվելու, այլև բոլոր տնտեսվարողներին:

Ենթադրաբար, դա վերաբերում է նաև դեղատներին: Այսինքն, եթե դեղ վաճառողին էլ, որպես տնտեսական գործունեություն ծավալողի, այսուհետ վերադարձվելու է ԱԱՀ–ն, ապա ստացվում է, որ սպառողների կողմից գնված դեղի կամ այլ ապրանքի ԱԱՀ–ն հետ գալով՝ ցանկացած տնտեսվարող դառնում է մի կլորիկ գումարի տեր: Ասել է թե, սպառողների կողմից վճարված ԱԱՀ–ն գումարվում, բազմապատկվում և հետ է վերադառնում տնտեսվարողի մոտ:

Եվ այս պարագայում, դեղեր վաճառողները փոխանակ ուրախանան, դեռ մի բան էլ դժգոհում են, որ այստեղ ինչ–որ բան այն չէ: Այսինքն, դեղ արտադրողների ու ներկրողների դժգոհության պատճառները կարող են անբարեխիղճ տնտեսվարողները լինել, ոչ թե նոր ներդրվող կարգերը և այս պարագայում հասկանալի է, թե ինչը կարող է մարդկանց մղել դեպի վրացական շուկա: Մնում է հասկանալ, թե իրականում որն է դեղատների ու դեղ արտադրողների դժգոհության պատճառը:

Շարունակությունը՝ «Փաստ» օրաթերթի այսօրվա համարում