Արտաքին պարտքը մինչև կես միլիարդ «ջրելու» ճանապարհ է բացվել. «Փաստ»
«Փաստ» օրաթերթը գրում է.
Պարզվում է՝ բնապահպանական ծրագրերի ֆինանսավորման համար ՀՀ բնապահպանության նախարարությունը նախատեսում է նոր գործիք ներդնել: Այսինքն, Հայաստանում կիրականացվեն բնապահպանական ծրագրեր, որի դիմաց Հայաստանի արտաքին պարտքը կզիջվի:
Այս մասին երեկ հրավիրված ասուլիսի ժամանակ ասել է ՀՀ բնապահպանության նախարարի տեղակալ Խաչիկ Հակոբյանը: Նա նաև տեղեկացրել է, որ այս մասով աշխատանքները սկսվել են 2017 թվականին:
«Այն լայնածավալ աշխատանք ու ընթացակարգ պահանջող գործընթաց է: Ասեմ, որ մինչև 570 մլն դոլարի ներուժ կա: Համապատասխանաբար, պետք է երկրում իրականացվեն բնապահպանական ծրագրեր` զիջելով տվյալ երկրի միջազգային պարտքը: Թե կոնկրետ ո՞ր ուղղություններով ծրագրերը կիրականացնեն, պայմանավորված է տվյալ երկրի միջազգային պարտավորություններով: Այսինքն` հաշվի պետք է առնվի, թե բնապահպանության ոլորտում Հայաստանը ո՞ր ուղղություններով է միջազգային պարտավորություններ ստանձնել: Այս պահին Համաշխարհային բանկի հետ մշակում ենք ընթացակարգերը, որոնցով մեր երկիրը առաջ կգնա: Նախնական ծրագրային մոտեցումները ավարտուն տեսքի բերելուց հետո դրանք կներկայացնենք հանրությանը»,–ասել է Խաչիկ Հակոբյանը:
«Հանուն կայուն զարգացման» ասոցիացիայի նախագահ, բնապահպան Կարինե Դանիելյանը «Փաստի» թղթակցի հետ զրույցում նշեց, որ ողջ աշխարհում արդեն 20 տարի է՝ նման ծրագրեր են իրականացվում:
«Մենք միշտ առաջարկել ենք, որ կարող ենք այդ ուղղությամբ գնալ, որովհետև այդպիսի միջազգային փորձ կա: Բայց պետք է իսկապես լավ ծրագրեր մշակել ու իրականացնել: Նման դեպքերում զարգացած երկրները ծրագրերի դիմաց զիջում են պետական պարտքը: Եթե մեր իշխանությունները կարողանան նման ծրագիր իրականացնել, շատ լավ կլինի: Ես շատ դրական եմ վերաբերվում այդ գաղափարին»,– ասաց Կ. Դանիելյանը:
Նա նաև նշեց, որ դրանք մշակելու համար հարկավոր է փորձագիտական մեծ խումբ ձևավորել և խորքային ուսումնասիրություն իրականացնել՝ հասկանալու համար, թե բնապահպանական որ ծրագրերն են ավելի առաջնային:
«Հարկավոր է այնպիսի ծրագրեր մշակել, որոնց իրականացումը ոչ միայն տեղական նշանակություն կարող է ունենալ կամ տարածաշրջանային, այլև համաշխարհային: Օրինակ՝ հանքարդյունաբերության և պոչամբարների խնդիրը մեր երկրի ցավն է: Կարծում եմ, որ այն նույնպես կհետաքրքրի միջազգային կառույցներին: Միջազգային կառույցները կարևորում են նաև կենսաբազմազանությանն առնչվող խնդիրների լուծումը, իսկ այն, ինչ մենք ունենք՝ բացառիկ է, և մեծ նշանակություն ունի ոչ միայն Հայաստանի համար, այլև համաշխարհային մասշտաբով»,– ասաց Կ. Դանիելյանը:
Նրա կարծիքով կարևոր են նաև օզոնային շերտի պահպանման, կլիմայի փոփոխության և անապատացման խնդիրների վերացմանն ուղղված ծրագրերը: Բնապահպանի խոսքով, անշուշտ, կարևոր է, երբ պետական պարտքը ներվում է, սակայն երկիրն ինքը նույնպես պետք է ներդրումներ իրականացնի մշակված ծրագրերի իրականացման համար:
Խոսելով բնապահպանական ծրագրերի միջոցով գումարներ լվանալու և այն մասին, թե իրականում հնարավո՞ր է արդյոք հաշվել, թե ծրագրի մեկնարկից առաջ և հետո, օրինակ՝ քանի թռչուն է ավելացել և այլն, Կ. Դանիելյանը նշեց, որ անշուշտ կարևոր է, թե ովքեր են նման ծրագրեր իրականացնում, չնայած որ, կան նաև գործիքներ՝ չափելու համար, թե տվյալ բնապահպանական խնդիրն ինչ չափով է լուծվել կամ առհասարակ լուծվել է, թե՝ ոչ:
Շարունակությունը՝ «Փաստ» օրաթերթի այսօրվա համարում
"Миссия Добро": Волонтеры из РФ помогают армянским детям с особенностями развития
Обещают «сожрать» право граждан Армении на свободный выбор: «Паст»
Тегеран-Москва-Ереван: формирующаяся новая ось в Евразии: «Паст»
Впервые гражданин РА был удостоен «Почетной грамоты» от президента РФ: «Паст»
С азербайджанской железнодорожной станции Беюк-Кясик отправлен состав с топливом для Армении
Сегодня - премьер-министр, завтра - бывший, а Церковь вечна: «Паст»
Итальянский городок в Тоскане платит $30 000 за переезд — с одним условием
Напряжная ситуация во дворе церкви
Картина «Почтальон» Карена Геворкяна удостоилась специального упоминания на фестивале документальног...
Визит Оверчука в Ереван։ новые импульсы Москвы: «Паст»
