Տաթև Հայրապետյան. «Մեհրիբան Ալիևայի առաջադրվելու դեպքում Ռուսաստանի հետ խնդիրներ կառաջանային». «Փաստ»

«Փաստ» օրաթերթը գրում է.

Հոկտեմբերին Ադրբեջանում կայանալիք նախագահական ընտրություններին իշխող՝ «Նոր Ադրբեջան» կուսակցությունից թեկնածու է առաջադրվել գործող նախագահ Իլհամ Ալիևը։

Նա արդեն չորրորդ անգամ է առաջադրում իր թեկնածությունը Ադրբեջանի ղեկավարի պաշտոնում։

Ադրբեջանագետ Տաթև Հայրապետյանը «Փաստ»–ի հետ զրույցում ասաց, որ Ալիևի առաջադրումը սպասելի էր, քանի որ այլ թեկնածուների անուններ չէին էլ շրջանառվում:

«Միայն ընդդիմադիր որոշ թերթերում մի քանի հոդվածներ հայտնվեցին, համաձայն որոնց, հնարավոր է այս անգամ Մեհրիբան Ալիևան առաջադրվի պաշտոնում: Այդուհանդերձ, հարևան երկրի ներքաղաքական վերադասավորումները հաշվի առնելով՝ ակնհայտ էր, որ դա լինելու էր Ալիևը: Երբ փոխնախագահ նշանակվեց Մեհրիբան Ալիևան, այն պաշտոնյաները, որոնք ներկայացնում էին նախիջևանյան կլանը, հեռացվեցին պաշտոններից: Այդ պաշտոններն այս պահին փաշաևներին մոտ կանգնած մարդիկ են զբաղեցնում, իսկ Մեհրիբանն այդ կլանի ներկայացուցիչն է: Անվտանգության, պաշտպանության համակարգերում դեռ կան նախիջևանյան կլանին հարող մարդիկ»,– ասաց նա:

Ադրբեջանագետի կարծիքով՝ եթե շրջանառվող լուրերի համաձայն նախագահի պաշտոնում Մեհրիբան Ալիևան առաջադրվեր, ապա արտաքին հարաբերություններում խնդիրներ կառաջանային:

«Խնդիրներ կառաջանային մասնավորապես Ադրբեջան– Ռուսաստան հարաբերություններում, որովհետև Մեհրիբանն արևմտամետ դիրքորոշում ունի»,– նկատեց մեր զրուցակիցը:

Անդրադառնալով ներքաղաքական իրավիճակին՝ նա ասաց. «Ադրբեջանում քիչ թե շատ այսօր ընդդիմադիր է Ադրբեջանի ժողովրդական կուսակցությունը, բայց այն որևէ ձևով պաշտոններ չի կարող հավաքել, քանի որ այդ երկրի ընդդիմադիրները բանտում են գտնվում: Օրինակ՝ Իգոր Մահմեդովը, որը չնայած եվրոպայի կողմից ճնշումներին, դեռ բանտում է գտնվում: Ամենագլխավոր մարդիկ անազատության մեջ են: Նույնիսկ այդ երկրի ընդդիմադիր մամուլը՝ Ազատություն ռադիոկայանի ադրբեջանական ծառայությունը, «Մայդան» հեռուստաընկերությունը, «Թուրան» գործակալությունը փակված են»:

Նա նաև նշեց, որ հարևան երկրում այսօր լուրջ տնտեսական խնդիրներ են առկա՝ բանկային համակարգը փլուզման եզրին է: Շատ բանկեր փակվել են, մնացածներն էլ ծանր վիճակում են:

Խոսելով հայ–ադրբեջանական սահմանին տիրող վիճակի մասին՝ Տաթև Հայրապետյանը նկատեց, որ սրացումներ չեն բացառվում:

«Եթե Ալիևը նկատեց, որ երկրի ներսում ինչ– որ խնդիրների է բախվում, դրանք շեղելու համար հնարավոր է սադրանքի գնա: 2016 թվականի ապրիլյան դեպքերը Ալիևի բոլոր ելույթներից անպակաս են՝ այն ներկայացնելով բացառիկ գործողություն, իբրև տարածքներ են ազատագրել: Դա ներքին լսարանում շատ ակտիվ քննարկման է դրվում: Ղարաբաղյան խնդիրը միշտ էլ եղել է Ադրբեջանի ներքին խնդիրները կոծկելու իշխանության թիվ մեկ զենքը: Վերջին շրջանի բանակցային ակտիվությունը հնարավորություն է տալիս դատելու, որ դրանք ուղղված են պատերազմի կանխմանը: Այսինքն՝ միջնորդ կողմերն ամեն ինչ անում են հնարավոր սրացումներից խուսափելու համար»,– շեշտեց նա:

Հիշեցնենք, որ Իլհամ Ալիևը ընտրվել էր 2003, 2008 և 2013 թվականներին։

2009 թ. Ադրբեջանում կայացած սահմանադրական հանրաքվեի արդյունքում վերացվել էր սահմանափակումը, որով միևնույն անձը չէր կարող ավելի քան երկու անգամ անընդմեջ ընտրվել Ադրբեջանի նախագահի պաշտոնում:

2016 թ. սեպտեմբերին Ադրբեջանում Սահմանադրության փոփոխությամբ նախագահի լիազորությունների ժամկետը երկարաձգվել է։ Ըստ Սահմանադրության փոփոխությունների՝ երկրի ղեկավարը կընտրվի 7 տարի ժամկետով:

Ադրբեջանում նախագահական ընտրություններն անցկացվելու են այս տարվա հոկտեմբերի 17–ին։

Շարունակությունը՝ «Փաստ» օրաթերթի այսօրվա համարում