Մի շարք ապրանքների արտադրության ծավալներն աճել են. «Փաստ»

«Փաստ» օրաթերթը գրում է.

Հայաստանում օճառի արտադրության ծավալն այս տարվա հունվար–հոկտեմբերին աճել է 95%–ով և կազմել 306,2 տոննա: Այս մասին «Փաստը» տեղեկացավ Ազգային վիճակագրական ծառայությունից: Իսկ նախորդ տարվա հունվար–հոկտեմբերին մեր երկրում արտադրվել է 157 տոննա օճառ:

Ըստ ԱՎԾ–ի՝ Հայաստանում ավելացել է նաև լվացող, մաքրող և օսլայող միջոցների արտադրությունը: Մասնավորապես, 2017 թ.–ի 10 ամիսներին արտադրվել է 3323,2 տոննա լվացող, մաքրող և օսլայող միջոցներ, իսկ 2016 թ.–ի նույն ժամանակահատվածում ՝ 1385,3 տոննա:

Վիճակագրական տվյալներով՝ գորգերի և գորգեղենի արտադրության ծավալը նվազել է 6,2%–ով:

Եթե 2016 թվականի հունվար–հոկտեմբեր ամիսներին արտադրվել է 16,2 տոննա գորգեր և գորգեղեն, ապա այս տարվա նույն ժամանակահատվածում՝ 15,2 տոննա:

Այս ժամանակահատվածում 15%–ով նվազել է նաև գուլպեղենի արտադրությունը:

10 ամիսների ընթացքում հանրապետությունում արտադրվել է 11952,8 հազար զույգ գուլպեղեն, իսկ նախորդ տարի նույն ժամանակահատվածում՝ 14070,3 հազար զույգ:

Ի տարբերություն սրանց՝ տրիկոտաժեղենի արտադրության ծավալներն աճել են: Այստեղ արտադրության ծավալներն աճել են 35,6%–ով, իսկ բամբակյա գործվածքների արտադրությունը՝ 52%–ով և կազմել 3,8 տոննա:

Մսի արտադրության ծավալներն աճել են 2,8%–ով՝ կազմելով 47435,4 տոննա: Նախորդ տարի նշված ժամանակահատվածում արտադրվել է 46159,6 տոննա միս:

Միևնույն ժամանակ, երշիկեղենի արտադրության ծավալներն աճել են 62,9%–ով և կազմել 8183,1 տոննա:

ԱՎԾ–ի փոխանցմամբ՝ 53,7%–ով աճել են մսի կիսապատրաստուկների արտադրության ծավալները և կազմել 612,7 տոննա:

Շարունակությունը՝ «Փաստ» օրաթերթի այսօրվա համարում