«Մամայի բալա». նոր սիթքոմ, նոր կերպարներ ու անկանխատեսելի իրավիճակներ
Արմենիա հեռուստաընկերության եթերում շուտով հեռուստադիտողը կտեսնի նոր ժամանցային նախագիծ՝ «Մամայի բալա» սիթքոմը՝ սիրված և ճանաչված դերասանների մասնակցությամբ։
Գլխավոր դերերում են Պոնչը, Ագնեսա Շահնազարյանը, Ավետ Զոհրաբյանը, Մագա Հարությունյանը, Ռոզա Դավթյանը, Սամվել Սարգսյանը, Անուշ Առաքելյանը և այլ դերասաններ։ Սիթքոմի սցենարի հեղինակներն են Ռաֆայել Ջալալյանն ու Տիգրան Գալստյանը, պրոդյուսերը՝ Վահան Թովմասյանը, իսկ ռեժիսորը՝ Գևորգ Ենոքյանը։
Tert.am Life-ը ներկա է եղել նկարահանման հրապարակում ու զրուցել ստեղծագործական թիմի ու դերասանների հետ:
«Ես մարմնավորում եմ հենց մամայի բալայի կերպարը». Պոնչ
Դերասան Տարոն Իսպիրյանի՝ Պոնչի խոսքով՝ սիթքոմում ինքը մարմնավորում է հենց «մամայի բալայի» կերպարը, որը բազմաթիվ զավեշտալի իրավիճակների կենտրոնում է հայտնվում։
«Չեմ ուզում շատ բացել փակագծերը, որպեսզի հետաքրքրությունը չկորի։ Թե որքանով է ստացվել, դեռ չեմ հասցրել տեսնել, բայց վստահ եմ՝ լավ աշխատանք է ստացվել, որովհետև թիմը շատ պրոֆեսիոնալ է։ Բոլորը աշխատում են, որպեսզի սիթքոմը հաջողվի, իսկ Արմենիա TV-ն արդեն հաջող փորձ ունի այս ժանրում»,- նշեց նա։
Դերասանի խոսքով՝ սիթքոմը պատմում է ուսանողների մասին, որոնք ապրում են մեկ հարկի տակ և մշտապես հայտնվում զվարճալի իրավիճակներում։ Պոնչը խոսեց նաև իր խաղընկերուհու՝ Ագնեսա Շահնազարյանի մասին, ով մարմնավորում է իր մայրիկին։
«Ագնեսա Շահնազարյանի հետ նկարահանման հրապարակում միանգամից հասկացել ենք իրար, և շատ հետաքրքիր ու զվարճալի դուետ է ստացվել»,- ասաց դերասանը։ Նա ընդգծեց նաև, որ նախագծի հիմքում ուժեղ սցենարն է։
«Սցենարի հեղինակներ Ռաֆայել Ջալալյանն ու Տիգրան Գալստյանը հումորի մեծ պաշար են տվել մեզ, դրա համար էլ սիրով ու ուրախությամբ ենք գալիս նկարահանման հրապարակ»,- հավելեց Պոնչը։
«Բոլորս ինչ-որ չափով մամայի բալա ենք». Ռաֆայել Ջալալյան
«Սիթքոմը երիտասարդների մասին է, ուսանողների, որոնք ապրում են մի հարկի տակ։ Հայաստանում շատ տարածված երևույթ է, երբ ուսանողները համատեղ բնակարան են վարձում։ Մեզ մոտ հենց այդ իրավիճակն է․ տարբեր բնավորությունների տեր տղաներ և աղջիկներ ապրում են տիկին Սվետայի տանը, որովհետև այն համալսարանին մոտ է և մատչելի»,- պատմեց նա։
Սակայն, ինչպես նշում է հեղինակը, ամեն ինչ այդքան հարթ չէ։ «Տիկին Սվետան շատ խիստ կին է, իսկ նրա որդին՝ մամայի բալան, ամեն կերպ խառնվում է ուսանողների կյանքին»,- նշեց Ռաֆայել Ջալալյանը։ Նրա խոսքով՝ սիթքոմի առաջին եթերաշրջանը բաղկացած կլինի 16 մասից։ «Բոլորս հույս ունենք, որ նախագիծը մեկ եթերաշրջանով չի սահմանափակվի»,- հավելեց նա։ Հեղինակը նաև անդրադարձավ սիթքոմի անվանը։ ««Մամայի բալա» հասկացությունը շատ հայկական է։ Տարբեր մակարդակների մամայի բալաներ կան․ մեկը կարող է մինչև 30 տարեկանը մայրիկից կախված լինել, մյուսը՝ ավելի քիչ, բայց իրականում բոլորս ինչ-որ չափով մամայի բալա ենք մնում»,- ընդգծեց նա։
«Հումորային ժանրում նկարահանվելն ավելի բարդ է, քան թվում է». Սամվել Սարգսյան
Դերասան Սամվել Սարգսյանը սիթքոմում մարմնավորում է Գոռ Վարդանյանին՝ բանակից նոր զորացրված երիտասարդի։
«Կերպարս ավագ սերժանտ է, ով նոր է վերադարձել բանակից և դեռ ապրում է այդ միջավայրի կանոններով։ Տանը տեղի ունեցող ամեն ինչին նա սկզբում մի քիչ կաշկանդված է վերաբերվում, բայց հետո դառնում է բոլոր իրադարձությունների ակտիվ մասնակիցը»,- պատմեց դերասանը։
Սամվել Սարգսյանի խոսքով՝ սա իր առաջին հումորային նախագիծն է, և ժանրն այնքան էլ հեշտ չէ, որքան թվում է։
«Բեմում հումոր խաղալն ավելի հեշտ է թվում, քան նկարահանման հրապարակում։ Երբ կատակները կարդում ենք, հաճախ ինքներս ենք շատ ծիծաղում, ու դժվար է լինում մեզ զսպել նկարահանման հրապարակում»,- ասաց նա։
Դերասանը կարևորեց նաև նկարահանման խմբի մթնոլորտը։ «Թիմը շատ դրական էներգիա ունի։ Բոլորը պատրաստ են օգնել թե՛ կադրում, թե՛ կադրից դուրս, և դա շատ կարևոր է»,- նշեց նա։
«Առաջին անգամ եմ նկարահանվում սիթքոմի ժանրում».Ավետ Զոհրաբյան
Դերասան Ավետ Զոհրաբյանն առաջին անգամ է նկարահանվում սիթքոմի ժանրում: «Մարմնավորում եմ Դավիթի կերպարը, շատ բարի մարդ է, մի քիչ կոմպլեքսավորված, փակված ինքն իր աշխարհում, հայտնվում է այս տանն ու սկսում է կամաց-կամաց բացվել:
Շատ յուրահատուկ է այս կերպարը, ու ինձ համար էլ նոր: Շատ լավ թիմ է ու շատ պրոֆեսիոնալ մարդիկ են, բոլորը շատ սիրել են բոլորին»,- նշեց Ավետ Զոհրաբյանը:
Նույն տանն ապրող ուսանողներ, որոնք դարձել են ընկերուհիներ…
Մագա Հարությունյանը, Ռոզա Դավթյանն ու Անուշ Առաքելյանը սիթքոմում մարմնավորում են նույն տանը բնակվող ուսանողուհիների։
Դերասանուհիների խոսքով՝ իրենց կերպարները շատ տարբեր են, սակայն նրանց միավորում է ընկերությունը։
«Մենք ժամանակի ընթացքում դարձել են ընկերուհիներ։ Երեքս էլ շատ տարբեր կերպարներ ենք խաղում, ու դա հետաքրքիր է դարձնում պատմությունը: Նկարահանումներն անցնում են շատ լավ ու դրական մթնոլորտում։ Բոլորս հավեսով ենք աշխատում»,- նշեցին դերասանուհիները։
«Մամայի բալա» սիթքոմը եթերում կլինի մայիսի 5-ից։ Թիմը խոստանում է՝ հեռուստադիտողին սպասվում են զվարճալի ու հետաքրքիր սերիաներ։
Вопрос об аресте Чалабяна дошел до Европейского парламента: «Паст»
Почему стало модно «отчитывать» оппозицию, и чего на самом деле ожидает общество? «Паст»
Глава МИД Иордании: Подписание мирного соглашения между Арменией и Азербайджаном близко
Артем Оганов получил международную госпремию Китая в области науки и техники — лично от Си Цзиньпиня
Небольшой французский уголок в Раздане при сотрудничестве с Конверс МСБ
IDBank предупреждает о мошеннических звонках от имени пенсионных фондов
Ложная дилемма мандатов: почему тема парламентского бойкота оппозиции - пустая повестка дня? «Паст»
Зачем Пашинян полетел в Россию?․ Аршак Карапетян
Правовой терроризм как начало падения власти: пример Гагика Царукяна и горькие уроки истории: «Паст»
Рост цен на продукты в Армении ускорился до 8,6%: ЕАБР
