Հարություն Մանուչարյան. «Որևէ գյուղում ես չեմ լինելու ղեկավար, այլ լինելու եմ տվյալ համայնքի ղեկավարի կողքին»

Orer.am-ը գրում է.

Նոյեմբեր 5-ին սահմանամերձ Տավուշի մարզում կկայանան խոշորացված Բերդ համայնքի ղեկավարի և ավագանու ընտրություններ: Այդ տարածաշրջանի 17 համայնքները կկազմեն Բերդ խոշոր համայնքը: Orer.am-ը հետ հարցացազրույց է ունեցել Բերդ համայնքի ղեկավարի և ավագանու ընտրություններին մասնակցող, քաղաքապետի թեկնածու, գործող քաղաքապետ Հարություն Մանուչարյանի հետ:

«Ծնվել և մեծացել եմ Բերդ համայնքում և այն կապվածությունը, որ ունեմ մեր հող ու ջրի և բնակչության հետ՝ նկարագրելն ուղղակի անհնար է: Առհասարակ, ցանկացած մարդու համար, ծննդավայրը հարազատ տան նման է. հոգատար ես, նվիրված, բայց երբ սահմանամերձ շրջաններում ես ապրում, էլ ավելի են մեծանում զգոնությունն ու պատասխանատվությունը՝ ծննդավայրիդ ու բնակիչներիդ հանդեպ: Քառօրյա պատերազմի ժամանակ ոչ միայն մեր համայնքը, այլև բոլոր 17 համայնքներն իրենց աշխատանքով են կանգնած եղել սահմանին: Այսօր Բերդի տարածաշրջանում չկա մի միջոցառում, որ մեր զինվորները մեր կողքին կանգնած չլինեն, զինվորականների կողմից չկա նախաձեռնված մի ծրագիր, որ ժողովուրդը նրանց աջակցած չլինի: Եվ ընդհանրապես, համար առաջին անվտանգությունը ես մեր ժողովրդի կապն եմ համարում բանակի և բանակի կապը մեր ժողովրդի հետ»:

-Պարոն Մանուչարյան, մինչ ընտրություններին ու Ձեր նախընտրական ծրագրերին անդրադառնալը, կխնդրեի նախ խոսեք այն աշխատանքների մասին, որոնք կատարվել են այս տարիների ընթացքում Բերդ քաղաքում:

-Այն քաղաքականությունը, որ որդեգրել ենք այս տարիների ընթացքում մեզ հնարավորություն տվեց հետևողական աշխատանքներ տանել համայնքային տնտեսության տարբեր ուղղություններով՝ հետզհետե լուծումներ տալով տասնամյակներ շարունակ կուտակված խնդիրների: Վերջին հինգ տարում համայնքում ծավալուն աշխատանքներ են տարվել բազմաբնակարան շենքերի վերելակների նորոգման ու գործարկման, շենքերի տանիքների ու մուտքերի վերանորոգման, փողոցների ու մայթերի, ինչպես նաև քաղաքի մուտքը հանդիսացող ճանապարհների բարեկարգման ուղղությամբ: Շարունակական ծրագրեր են իրականացվում նաև արտաքին լուսավորության ցանցի ընդլայնման ու աղբահանության պատշաճ կազմակերպման ուղղությամբ: Բերդի բնակիչների հանգստի կազմակերպման համար կառուցվել են հանգստի հարմարավետ գոտիներ, ամբողջությամբ հիմնանորոգվել են համայնքում գործող երկու մանկապարտեզները և այսօր շուրջ 430 փոքրիների կրթության ու դաստիարակության համար ստեղծված են անհրաժեշտ բոլոր պայմանները: Աշխատանքներ են տարվել նաև համայնքի մշակույթի տան, երաժշտական դպրոցի, սպորտդպրոցի պայմանների բարելավման ուղղությամբ, ինչի արդյունքում էլ զգալիորեն ավելացել է վերոնշյալ օջախներ հաճախող երեխաների թիվը: Համայնքի բնակիչներն այսօր զբաղվում են նաև հողագործությամբ և պետք է նկատենք, որ եթե մինչև իմ համայնքի ղեկավար նշանակվելը այդ հողերի 30 հա է մշակվել, այսօր այդ ցուցանիշն արդեն հասել է շուրջ 300 հա-ի: Վերջին հինգ տարում համայնքի համար անչափ կարևոր էր նաև շուրջ 100 մլն դրամի գյուղատնտեսական տեխնիկայի ձեռքբերումը և մի շարք այլ ծրագրեր որոնք կյանքի են կոչվել: Համայնքի խնդիրների լուծման առումով մենք այս տարիների ընթացքում համագործակցել ենք նաև միջազգային տարբեր կառույցների ու կազմակերպությունների հետ: Եվ պետք է ուրախությամբ փաստեմ, որ բոլոր այն ծրագրերը, որոնք նախանշվել են այդ փոխգործակցության շրջանակում հաջողությամբ կյանքի են կոչվել, ինչն էլ բերել է վստահություն համայնքի հանդեպ՝ ապահովելով այդ ծրագրերի շարունակականությունը: Առիթն օգտագործելով շնորհակալություն եմ հայտնում նաև բոլոր այն մարդկանց, ովքեր գտնվելով արտերկրում շարունակում են իրենց լուման ներդնել Բերդի զարգացման գործում: Սա, միանշանակ, վստահության այն մթնոլորտի ապահովման արդյունքն է, որն այսօր առկա է մեր գործունեության յուրաքանչյուր ծրագրում: Մեր առաջնահերթ նպատակներից է որքան հնարավոր է շատ ներդրումներ ապահովել, ինչը կարևոր դերակատարում կունենա համայնքի զարգացման հարցում: Այս առումով, անչափ կարևոր էին Հանրապետության Նախագահի ու ՀՀ կառավարության որոշումները, որոնց համաձայն էլ սահմանամերձ շրջաններում բոլոր այն գործարարներին, ովքեր ցանկանում են ներդրումներ կատարել՝ տրվում են շատ լուրջ արտոնություններ:

-Ընտրություններին հաշված օրեր են մնացել, ի՞նչ կցանկանայիք ասել ձեր ընտրողներին, որ դեռևս չեք հասցրել այդ մասին խոսել:

-Ամենայն հարգանք ունենալով մյուս թեկնածուների հանդեպ, կասեմ հետևյալը. ընտրությունը մեր ժողովրդինն է, կամ նրանք ընտրում են մահակով տերերի, կամ ընտրում են իրենցից մեկին, ով պատրաստ է բնակիչների հետ ու բնակիչների համար միշտ աշխատել: Ես համոզված եմ, որ մի ժողովուրդ, որ կարողացել է իրենից մի քանի անգամ գերազանցող ադրբեջանցիներից սահման պահել, այդ ժողովուրդը տերեր չի փնտրում: Ես հավատում եմ, որ այդ ժողովուրդը փնտրում է իրենից մեկին և կընտրի իրենից մեկին։