Ռուսաստանից մեծ թվով զբոսաշրջիկներ են այցելել Հայաստան. «Փաստ»

«Փաստ» օրաթերթը գրում է.

ԵՏՄ–ի շնորհիվ Հայաստանում այս տարի զբոսաշրջության ոլորտում 37 տոկոս աճ է գրանցվել. տվյալները Հայ–ռուսական միջտարածաշրջանային վեցերորդ և Եվրասիական գործընկերության երկրորդ միջազգային համաժողովների համատեղ լիագումար նիստին վարչապետ Կարեն Կարապետյանն է վկայակոչել:

Այս տարի բոլոր տուրիստական ընկերությունները լարված են աշխատել, հետևաբար, զբոսաշրջիկների թվի ավելացում կա՝ իր հերթին «Փաստ» օրաթերթի թղթակցի հետ զրույցում հայտնեց Հայաստանի ներգնա տուրօպերատորների միության տնօրեն Կարինե Դավոյանը:

Նրա հավաստմամբ՝ ռուսաստանյան ներքին անձնագրերով Հայաստան այցելելու հնարավորության վերաբերյալ որոշման ընդունումից հետո այդ երկրից զգալի ավելացել են զբոսաշրջիկների թիվը:

«Ռուսաստանից այս տարի համեմատաբար մեծ թվով զբոսաշրջիկներ են եկել»,– նկատեց Հայաստանի ներգնա տուրօպերատորների միության տնօրենը:

Զբոսաշրջության կոմիտեն ոլորտը զարգացնելու համար մի շարք քայլեր է ձեռնարկել, ինչը ևս նպաստել է զբոսաշրջիկների թվի ավելացմանը: Հայաստանի ճանաչելիությունը բարձրացնելու հետ կապված ակտիվ միջոցառումներ են ձեռնարկվել:

«Ընկերություն կա, որ ասում է՝ ինձ մոտ այս տարի 40% աճ է եղել, մյուսի մոտ՝ 30: Միջին հաշվով՝ զբոսաշրջության ոլորտում 30% աճ է գրանցվել»,– փոխանցեց նա:

Նախորդ տարի Հայաստանում զբոսաշրջության ոլորտում աճ չի եղել: Դա էլ, ըստ ոլորտի ներկայացուցչի, իր հիմնավորումն ունի: Ապրիլյան ռազմական գործողություններից հետո մեր երկիր այցելողների թիվը կտրուկ նվազեց:

«Շատ կարևոր է նաև տարածաշրջանի խաղաղությունը, այս տարի խաղաղ էր»,– շեշտեց նա:

Դավոյանը տեղեկացրեց, որ աճել է նաև Լիբանանից եկող տուրիստների թիվը:

«Այդ և այլ երկրներից չվերթներ կային, որոնք ևս ազդել են զբոսաշրջության աճին»,– եզրափակեց նա:

2017 թվականի առաջին կիսամյակի ընթացքում, ըստ Զբոսաշրջության պետական կոմիտեի, Հայաստան ներգնա զբոսաշրջային այցելությունների թիվն աճել է՝ կազմելով 622381, ինչը 24,2%–ով ավելի է նախորդ տարվա նույն ժամանակաշրջանի համեմատ:

Հերմինե Նաղդալյան. «Ագրամունտն այլ ելք չուներ, որովհետև իրեն խայտառակ ձևով էին ճանապարհելու»
Աննա Բադալյան

Եվրախորհրդի խորհրդարանական վեհաժողովի նախագահ Պեդրո Ագրամունտը պաշտոնաթող է եղել: ԵԽԽՎ–ի հոկտեմբերյան նստաշրջանի ընթացքում պետք է կայանար Ագրամունտի պաշտոնական հեռացումը քվեարկության միջոցով: Ընթացակարգն իրականացնելու համար հունիսին ԵԽԽՎ–ն դիմեց աննախադեպ քայլի՝ փոխելով Վեհաժողովի հիմնական փաստաթուղթը՝ կանոնակարգը: Ագրամունտի շուրջ սկանդալը ծավալվել էր ԵԽԽՎ–ի ապրիլյան նստաշրջանի ընթացքում, երբ եվրախորհրդարանականներն սկսեցին Վեհաժողովի ղեկավարին քննադատել մարտին Սիրիա նրա կատարած ուղևորության համար:

ՀՀ ԱԺ արտաքին հարաբերությունների մշտական հանձնաժողովի նախագահի տեղակալ, ԵԽԽՎ պատվավոր անդամ Հերմինե Նաղդալյանը «Փաստ»–ի հետ զրույցում նշեց, որ Պ. Ագրամունտը դեռ շատ վաղուց պետք է հրաժարական տար:

«Իսկ հրաժարականի պատճառն ի վերջո այն է, որ նա համոզվեց՝ եվրոպական քաղաքական մտքի ներկայացուցիչների առաջ ինքը բացարձակ անընդունելի և կոռումպացված տեսակ է:

Նա իր կոռուպցիոն բարքերն ու քաղաքականությունը ներմուծեց ԵԽԽՎ: Բայց ի շնորհիվ Եվրախորհրդի խորհրդարանական վեհաժողովի պատվիրակների վճռական գնահատականի՝ նա հրաժարական տվեց: Պ. Ագրամունտն այլ ելք չուներ, որովհետև իրեն խայտառակ ձևով էին ճանապարհելու: Այնպես չէ, որ կամավոր հրաժարական է տալիս: Սա ոչ միայն նրա անձի շուրջ ձևավորված գնահատականն է, այլև մատնանշում է այն, որ Եվրոպայի քաղաքական դաշտի ներկայացուցիչները չեն ընդունում այդ վերաբերմունքն ու բարքերը, կոռումպացվածությունն ու անազնվությունը: Մեծ հաշվով՝ շատ ավելի լայն է նշանակությունը, քան Ագրամունտի հրաժարականը: Բացի այդ, որպես երևույթ այս հրաժարականը բացառիկ է, որովհետև ԵԽԽՎ–ի 60–ամյա կենսագրության ընթացքում նման դեպք չէր եղել»,–ասաց Հ. Նաղդալյանը:

Պատգամավորն ընդգծեց, որ ԵԽԽՎ պատմության մեջ որևէ նախագահի հանդեպ այդպիսի գնահատականներ չէին հնչել:

Անդրադառնալով հայկական պատվիրակության ազդեցությանը, պատգամավորը նշեց, որ վերջին երկու–երեք տարիների ընթացքում մեր պատվիրակությունը շատ լուրջ քաղաքականություն է վարել:

«Այդ քաղաքականությունը մենք անվանել ենք ԵԽԽՎ ինքնամաքրման և առողջացման քաղաքականություն: Մենք մի շարք նախաձեռնություններով ենք հանդես եկել և Պ. Ագրամունտի հրաժարականը առանձին հարց չի եղել: ԵԽԽՎ հիմնադիր հայրերի մտքով անգամ չէր կարող անցնել, որ կառույցը կդառնար այնպիսի կոռումպացված հարթակ, ինչպիսին էր վերջին տարիներին: Նաև մեր պատվիրակության ջանքերով, նախաձեռնությամբ ու մասնակցությամբ է, որ այդ գործընթացները բավականին առաջ են գնացել»,–նշեց մեր զրուցակիցը՝ հավելելով, որ թեև Ագրամունտը առաջին ԵԽԽՎ նախագահն է, որը հրաժարական է տալիս, բայց մինչ այդ այլ պաշտոնյաներ ևս հրաժարական են տվել:

«Այս պրոցեսն իր շարունակությունն անպայման ունենալու է: Հայկական պատվիրակությունը շատ մեծ աշխատանք է տարել: Մենք շատ պատվիրակների հետ ենք խոսել ու ներկայացրել ենք փաստեր, իրավիճակներ, հոդվածներ և հրապարակումներ ենք պատրաստել: Այդ ամենը փորձել ենք հասցնել մեր եվրոպացի գործընկերներին, որպեսզի նրանք տեղյակ լինեն ու աջակցեն այդ պրոցեսներին: Պ.Ագրամունտի հեռացումը նաև սրա արդյունքն է: Նա տեսավ, որ ոչ ոք չկա, ով կկանգնի իր կողքին ու կպաշտպանի իրեն: Բարոյահոգեբանական այդ իրավիճակը ԵԽԽՎ–ում փոխելու գործընթացը երկու տարիների ընթացքում է առաջացել, և մենք դրան մասնակցելու ջատագովներն ենք եղել»,– եզրափակեց պատգամավորը:

Շարունակությունը՝ «Փաստ» օրաթերթի այսօրվա համարում