«Էնպես չի որ մենք պարապ գործերի մինիստր ենք, եկել ենք պարապ տեղը կանգնել». «Փաստ»

«Փաստ» օրաթերթը գրում է.

Երեկ կառավարության շենքի դիմաց հավաքվել էին «Վերնիսաժից» Հրազդան մարզադաշտ տեղափոխված մի խումբ վաճառականներ, ովքեր դժգոհում էին այդ տեղափոխությունից:

Հիշեցնենք, որ նախորդ տարի, երբ որոշում կայացվեց «Վերնիսաժի» վերակառուցման, արդիականացման, կանոնակարգման և բարեկարգման աշխատանքներ իրականացնել, միաժամանակ հաստատվեց, թե դրա արդյունքում այնտեղ շուն, շինանյութ և հագուստ չպետք է վաճառվի:

Առևտրականներից Հասմիկ Արզումանյանը, ով 20 տարուց ավելի աշխատել է «Վերնիսաժում», ասում է, թե այդ ինչպե՞ս եղավ, որ իրենց ապրանքները չի կարելի վաճառել, բայց «Վերնիսաժում» մարդիկ կան, որոնց թույլատրվում է հագուստ վաճառելը: «Հանգուստ, օծանելիք, կոշկեղեն ենք վաճառել: Հրազդան մարզադաշտում արդյունք չկա, մի տարիա կանգնած ենք: Ծախսերն անում ենք, ծախսածի կեսի կեսը դուրս չի գալիս ու դատարկ, չորուցամաք հետ եմ գալիս տուն»,– պատմեց նա:

Ըստ նրա՝ «Վերնիսաժում» կան մարդիկ, ովքեր սպասք են վաճառում, սակայն միևնույն ժամանակ տակից, երբ մարդ չկա, հագուստ էլ են վաճառում: Ասում է, թե ապակեղենը կամ «Ադիդասի» պիտակը վրան հագուստը մի՞թե վերնիսաժային ապրանք է:

«Երկու անգամ գնացել ենք «Վերնիսաժ», մեր ապրանքները փռել: Թեպետ էլի հսկիչները չթողեցին, հավաքել տվեցին: Ու մենք նկատեցինք, որ մյուսներն էլ իրենց հագուստները սկսեցին հավաքել: Իսկ երբ մարդ չկա, արխային վաճառում են»,– նկատեց նա:

Տիկին Հասմիկի խոսքով, այս պահին «Վերնիսաժից» Հրազդան գնացած առևտրականնները մոտ 20–30 հոգի են և նրանց մեծ մասը երեկ եկել էր կառավարության շենքի մոտ՝ վարչապետի հետ հանդիպման ակնկալիքով:

«Սպասում ենք վարչապետին, որ մեր հայցը լսի: Ասում են, որ իրեն տեղյակ են պահել: Անտեղի չենք հավաքվել, ամենքս մեր տունը ունենք, էնպես չի որ պարապ գործերի մինիստր ենք, եկել ենք ստեղ, մենք մեր տունը լիքը խնդիրներ ունենք»,– ասաց նա:

«Վերնիսաժից» «դուրս մնացած» առևտրականների խոսքով՝ իրենց նախկին «աշխատավայրում» օրական գոնե 5000 դրամ էին աշխատում, իսկ տեղափոխությունից հետո՝ նունիսկ 500 դրամ չի ստացվում աշխատել: Պատճառներից մեկն էլ այն է, որ իրենց նախկին հաճախորդները տեղափոխության մասին տեղյակ չեն և կամ իմացողների համար այնքան էլ հարմար չէ մի կտոր հագուստի համար քաղաքի մյուս ծայրը հասնել:

Մեկ այլ առևտրական՝ Հասմիկ Հովհաննիսյանն էլ մեզ հետ զրույցում ասաց, որ իրենք շաբաթական ընդամենը երկու օր են կանգնում, այդ դեպքում ինչո՞ւ չեն թողնում շարունակել իրենց աշխատանքը: Ասում է, որ Հրազդանի մարզադաշտի հարևանությամբ կանգնելն իրենց ընդհանրապես ձեռնտու չէ, քանի որ Վերնիսաժում նույնիսկ մինչև երեկոյան ժամը 19–ը կարող էին առևտուր անել, իսկ նոր տեղում ժամը 14–ից հետո, ինչպես իրենք են բնորոշում՝ առևտուրը կանգնած է: Բացի այդ այնտեղ նախկինում մեծ ծածկեր են դրված եղել, սակայն վերջերս հանել են ու ըստ վաճառական կնոջ՝ արդյունքում իրենց հագուստի որակը փչանում է, գույներն էլ խամրում:

«Մենք խամաճիկնե՞ր ենք, իրանք էլ մեր կուկլավոդները, հա՞: Էդ ինչ հիմնավորմամբ մեր հագուստը չի կարող այնտեղ վաճառվել, իսկ որսորդական ու զինվորական հագուստը կարող է»,– նշեց նա:

Տիկին Հասմիկը պատմում է, որ իրենք արտասահմանից բերված որակյալ հագուստներ էին վաճառում, նոր ու պիտակով, և «Վերնիսաժում» կանգնող այլ առևտրականները նշում են, թե վերջինների գնալուց հետո իրենց առևտուրն էլ է նվազել. «Տեսեք, գալիս էին մեզ մոտ, մի բան առնում, մի բան էլ կողքի տաղավարից: Էդպես շղթայական: Հիմա մեզ հանել են, ու մյուսներն էլ ինչ–որ չափով հաճախորդներ են կորցրել»,– հավելեց նա:

Շարունակությունը` «Փաստ» օրաթերթի այսօրվա համարում