«Եթե մտածենք, որ երկրում ամեն ինչ կախված է մեկ մարդուց, ուրեմն պետք է թողնենք ու արտագաղթենք». «Փաստ»

«Փաստ» օրաթերթը գրում է.

Մեր հյուրն է «Ելք» դաշինքի նորընտիր պատգամավոր Գևորգ Գորգիսյանը

– Պարոն Գորգիսյան, Ձեր դաշինքը ինչո՞ւ որոշեց մասնակցել Երևանի ավագանու ընտրություններին, երբ քաղաքապետի աշխատանքն առանձնապես քաղաքական գործունեություն չէ, նրա խնդիրը նախ և առաջ քաղաքի կենսագործունեության ապահովումն է:

Դուք շատ սխալվում եք: Քաղաքապետի աշխատանքը քաղաքական լուրջ աշխատանք է: Չմոռանանք` Երևանում է բնակվում Հայաստանի բնակչության մեծ մասը: Հետևաբար այս մարդկանց վերաբերվող քաղաքական պրոցեսների իրականացնողը հենց քաղաքապետն է: Քաղաքապետարանին են ենթարկվում դպրոցները, մանկապարտեզները, որոնց տնօրենները տեսանք, թե վերջին ընտրությունների ժամանակ ինչպիսի խայտառակ «քաղաքական» գործառույթներ էին իրականացնում:

Նաև քաղաքապետարանի բյուջեի ոչ ճիշտ և ոչ համաչափ բաշխումը, կոռուպցիոն բազմաթիվ ռիսկերը, որ կան տարբեր աշխատանքների հետ կապված տարբեր ոլորտներում, ևս պարունակում են քաղաքական տարրեր և ենթադրում են քաղաքական մոտեցումներ:

Ուստի մեր դաշինքը չէր կարող անմասն մնալ նման կարևորության ընտրություններից:

– Իսկ անգամ ընտրվելու դեպքում Դուք կարո՞ղ եք ինքնուրույն ինչ–որ բան անել, երբ մեր երկրում ամեն ինչ կախված է մեկ մարդուց կամ որ նույնն է` Բաղրամյան 26–ից:

– Եթե մտածենք, որ մեր երկրում ամեն ինչ կախված է մեկ մարդուց, ուրեմն պետք է թողնենք ու արտագաղթենք: Մենք չենք հավատում այդ հորինվածքին:

Ամեն ինչ կախված չէ մեկ մարդուց, ամեն ինչ որոշում է Հայաստանի Հանրապետության քաղաքացին: Ինչպես այս ընտրություններում Հայաստանի Հանրապետության քաղաքացին որոշեց, թե ինչ խորհրդարան է ուզում ունենալ:

Իսկ Երևանի բնակչության մոտ 15 տոկոսն իր ձայնը տվել է «Ելք» դաշինքին: Մենք հույս ունենք այս արդյունքը կրկնապատկել և եռապատկել` ամբողջ թիմով կենտրոնանալով Երևանի վրա և աշխատելով Երևանի բնակիչների հետ:

Հաշվի առնելով, որ հիմնական պայքարը ընթանալու է «Ելք» դաշինքի և Հանրապետական կուսակցության միջև, մենք մեր շանսերը բավականին բարձր ենք գնահատում ու գնում ենք հաղթելու:

– Ասացիք, որ բնակչության 15%–ն է Ձեզ ձայն տվել, մինչդեռ Հանրապետականին տվել է ավելի քան 50%–ը:

– Այդպես է: Բայց դա ոչինչ չի նշանակում: Որովհետև սրանք այլ ընտրություններ են: Մենք էլ ավելի լուրջ թիմով և ավելի մեծ կազմով ենք ընտրապայքարի մեջ մտած ու գնում ենք հաղթանակի: Երկրորդ տեղի համար մենք չենք պայքարում:

– Բայց արդյունքն ավելի էակա՞ն չէր լինի, եթե երկու կողմ լիներ պայքարի մեջ` իշխանություն և ընդդիմություն: Մինչդեռ հիմա ընդդիմադիր ձայները երկու մասի են բաժանվելու: Դա Ձեզ չի՞ վախեցնում:

– Ճիշտ եք ասում: Բայց մենք համապատասխան առաջարկով դիմեցինք երրորդ կողմի ղեկավարին` Զարուհի Փոստանջյանին: Իսկ նա մերժեց ընտրություններին համատեղ մասնակցելու մեր առաջարկը: Եվ արդյունքում այս իրողությունն է:

Բայց նույնիսկ այս պարագայում «Երկիր ծիրանի» կուսակցության հավաքած ձայները մեզ չեն խանգարելու: Քանի որ նրանք լինելու են Երևանի ավագանու ընդդիմադիր խմբակցություն: Եվ, կարելի է ասել, բացառում եմ, որ քաղաքապետ նշանակելու կամ որևէ այլ կարևոր հարցում նրանք պաշտպանեն Հանրապետական կուսակցությանը: Ասել է թե` այդ ձայներն ամեն դեպքում լինելու են ընդդիմության ձայները` ավագանու կազմում:

– Իսկ ի՞նչ տարբերություն կլինի Երևան քաղաքի կառավարման գործում Ձեր և Հանրապետական կուսակցության միջև:

– Շատ մեծ տարբերություն: Վերջերս համացանցում հայտնվեց տեսանյութ Նոր Կյանք գյուղում «Ելք» դաշինքից ընտրված գյուղապետի գործունեության վերաբերյալ: Բանն այն է, որ այս մարդը շատ կարճ ժամանակամիջոցում, ատկատներից հրաժարվելով ու օրենքի սահմաններում գործելով, կարողացել էր մոտ 50%–ով խնայել համայնքային բյուջեի միջոցները: Այդպես է լինելու նաև Երևանի պարագայում:

Իսկ մենք տեսել ենք, թե ինչպես է գործում Հանրապետական կուսակցությունը: Նրանց կառավարման տարիներին վերացել են մշակութային արժեքներ: Ատկատների տեսքով անխնա գումարներ են ծախսվել: Անցած տարի հրապարակվեցին քաղաքապետարանի գնումները: Պարզվեց, որ մի քանի հարյուր հազար դրամ ծախսել էին կոնյակի վրա, տասնյակ հազարավոր դրամներով ձեռք էին բերել կոնյակի մեկ բաժակ: Բնականաբար, այս ամենը բյուջեի գումարների աննպատակ մսխում է: Իսկ մենք գոնե դա կարող ենք վերացնել:

Ավելացրած` մենք կերաշխավորենք բոլոր այն ուսուցիչների, տնօրենների քաղաքական անձեռնմխելիությունը, ովքեր այժմ ենթարկվում են ճնշումների: Ուղղակի կբացառենք և թույլ չենք տա, որ որևէ մեկը բռնանա նրանց կամքի ու կամարտահայտման վրա:

– Աստված անի` հաջողեք:

Շարունակությունը` «Փաստ» օրաթերթի այսօրվա համարում