Բանջարեղենի և մրգի ընդհանուր գնաճը կազմել է 20,7%. «Փաստ»

«Փաստ» օրաթերթը գրում է.

Նոյեմբերին հոկտեմբերի համեմատ սպառողական շուկայում արձանագրվել է 2% գնաճ: Այս մասին «Փաստ» օրաթերթը տեղեկացավ Ազգային վիճակագրական ծառայությունից: Գնաճը հիմնականում պայմանավորվել է սննդամթերքի և ոչ ալկոհոլային խմիչքի 4,2% գնաճով: Սննդամթերքի և ոչ ալկոհոլային խմիչքի, ինչպես նաև ծխախոտի գները նշված ժամանակահատվածում աճել են 3,8%–ով, ոչ պարենային ապրանքներինը՝ 0,5%–ով, իսկ ծառայությունների սակագները՝ 0,4%–ով:

Նոյեմբերին նախորդ ամսվա համեմատ հանրապետության դիտարկվող բոլոր քաղաքներում գրանցվել է սպառողական գների՝ 1,4–2,5% գնաճ, այդ թվում, գնաճի ամենաբարձր ցուցանիշը գրանցվել է Գյումրիում: Արձանագրվել է սննդամթերքի և ոչ ալկոհոլային խմիչքի՝ 4,2% գնաճ, ինչին հիմնականում նպաստել է մրգի և բանջարեղենի՝ համապատասխանաբար 13,7% և 25% գնաճը:

Բանջարեղենի շուկայում այս տարի նախորդ տարվա նույն ժամանակահատվածի համեմատ գրանցվել է 10,4%, իսկ 2017 թ. հոկտեմբերի համեմատ` 25% գնաճ: Մրգի դեպքում 2017 թ. նոյեմբերին 2016 թ. նոյեմբերի համեմատ արձանագրվել է 0,7% գնանկում, իսկ ընթացիկ տարվա հոկտեմբերի համեմատ`13,7% գնաճ:

Ըստ ԱՎԾ ամփոփագրի՝ նոյեմբերին հոկտեմբերի համեմատ բանջարեղենի և մրգի ընդհանուր գնաճը կազմել է 20,7%: Կաթնամթերքի, պանրի և ձվի ապրանքախմբում արձանագրվել է 3,5% գնաճ, այդ թվում, ձվի գինն աճել է 7,8%–ով: Յուղերի և ճարպերի ապրանքախմբում 2017 թ. նոյեմբերին 2016 թ. նոյեմբերի համեմատ արձանագրվել է 14,7%, իսկ հոկտեմբերի համեմատ՝ 2,7% գնաճ: Վերջինս հիմնականում պայմանավորվել է կարագի 5,5% գնաճով:

Մսամթերքը մեկ ամսվա ընթացքում 1,6%–ով է թանկացել: Ձկնամթերքի գները ևս բարձրացել են: Ձկան և ծովամթերքի ապրանքախմբում նոյեմբերին նախորդ տարվա նույն ժամանակահատվածի համեմատ արձանագրվել է 27%, իսկ հոկտեմբերի համեմատ` 0,3% գնաճ: Սրանք դեռ միակ ապրանքները չեն, որոնք մեկ ամսվա ընթացքում թանկացել են:

2017 թ. նոյեմբերին հոկտեմբերի համեմատ հանրապետությունում արձանագրվել է հրուշակեղենի՝ 0,3%, ալկոհոլային խմիչքի և ծխախոտի 0,4% գնաճ:

ԱՎԾ–ն նաև արձանագրել է այն ապրանքների ցուցակը, որոնք չեն թանկացել: Եվ այսպես՝ շուկայում շաքարի, թեյի ու սուրճի գները նվազել են:

Շաքարավազի ապրանքախմբում 2017 թ. նոյեմբերին 2016 թ. նոյեմբերի համեմատ գրանցվել է 5,4%, իսկ այս տարվա հոկտեմբերի համեմատ՝ 1,6% գնանկում: Սուրճի, թեյի, կակաոյի, ոչ ալկոհոլային խմիչքի, հացաբուլկեղենի և ձավարեղենի դեպքերում 0,2% գնանկում է եղել:

Թանկացել են նաև ոչ պարենային ապրանքները: Նոյեմբերին հոկտեմբերի համեմատ ոչ պարենային ապրանքների շուկայում գրանցվել է 0,5% գնաճ, ինչը մեծապես պայմանավորվել է հագուստի 3,4% գնաճով:

Մեկ ամսում բենզինի և դիզելային վառելիքի գներն աճել են 0,5%–ով: 2017 թ. նոյեմբերին 2016 թ. նոյեմբերի համեմատ հանրապետությունում գրանցվել է բենզինի և դիզելային վառելիքի՝ համապատասխանաբար 11,6% և 15,3%, իսկ 2016 թ. դեկտեմբերի համեմատ՝ 16,4% և 16,8% գնաճ:

Հանրապետության դիտարկված բոլոր քաղաքներում ոչ պարենային ապրանքների գներն աճել են 0,2–2%–ով, ընդ որում, գնաճի ամենաբարձր ցուցանիշն Իջևանում է եղել: Մայրաքաղաքում ոչ պարենային ապրանքների գներն աճել են 0,5%–ով:

Բնակարանային ծառայությունների սակագները նշված ժամանակահատվածում աճել են 0,2%–ով, տրանսպորտինը՝ 1,4%–ով, ինչը պայմանավորված է եղել օդային տրանսպորտով միջազգային չվերթների ծառայությունների սակագների 8,9% հավելաճով:

Տեղեկացնենք նաև, որ հանգստի և մշակույթի ծառայություններինը ևս թանկացել են: Գնաճն այս ծառայությունների դեպքում 1,5% է կազմել: Միաժամանակ, հանրապետությունում գրանցվել է հյուրանոցային ծառայությունների սակագների 7% նվազում: Ի դեպ, առողջապահության, կապի և կրթության ծառայությունների սակագների մակարդակը նախորդ ամսվա համեմատ մնացել են անփոփոխ:

Շարունակությունը՝ «Փաստ» օրաթերթի այսօրվա համարում