Թանկացումներ դիզվառելիքի շուկայում. «Փաստ»

«Փաստ» օրաթերթը գրում է.

Ներքին շուկայում հեղուկ վառելանյութի գները վերջին օրերին սկսել են դանդաղորեն բարձրանալ։

Թանկացել է բենզինը. ահազանգում են վարորդները: Նրանք բողոքեցին, որ բենզինի գինը օգոստոս ամսվա վերջին բարձրացել է 10 դրամով, գնի բարձրացում արձանագրվել է նաև հաջորդ ամիսներին: Այսպիսով՝ բենզինի գինը, վերջին երկու ամսում բարձրացել է 20 դրամով:

Բենզինի թանկացման վերաբերյալ բողոքներ «Իրազեկ և պաշտպանված սպառող» հասարակական կազմակերպությունն առայժմ չի ստացել. «Փաստ» օրաթերթի թղթակցի հետ զրույցում ասաց ՀԿ ղեկավար Բաբկեն Պիպոյանը:

Փորձագետը, սակայն, բացատրում է, որ բենզինի գինը մեր երկրում միշտ էլ տատանողական է եղել:

«Միշտ էլ բենզինի գինը անկանոն է եղել մեր երկրում: Բենզինի գները մի շարք հարցեր ունեն իրենց մեջ, որոնք դեռ պարզաբանված չեն, գնի փոփոխությունները մի փոքր խնդրահարույց են և մի բենզալցակայանում բենզինի գնի 5 կամ 10 դրամ գնաճը դեռևս հիմք չէ ոլորտի մասին գնահատական տալու համար: Պետք է հասկանալ՝ ո՞վ է խաղեր տվողը և ինչի՞»,– հարց բարձրացրեց Պիպոյանը: Նրա խոսքով՝ բենզինի շուկայում մրցակցություն չկա, ինչն էլ նման իրավիճակ է ստեղծում:

«Պետությունը ոչ թե պետք է ցույց տա բիզնեսմենների կլուբը և ասի, որ այս մարդկանց հետ աշխատելու ենք, այլ առանց այդ մասին հեռուստացույցով ցույց տալու ասեն՝ այնտեղ էժան բենզին կա, դե գնացեք բերեք»,– ներկայացրեց նա:

Բաբկեն Պիպոյանը նշեց, որ խնդրի կարգավորման հարցում մեծ է կառավարության դերը: Քանի դեռ պետությունը քայլեր չի ձեռնարկում, բենզինի շուկայում գնային տատանումները շարունակվելու են:

«Խաղացողները քիչ են. մրցակցային մարմինը նայում է ապրանքի ձեռքբերման գինը: Օրինակ՝ ասում են, որ Ռուսաստանից բենզինը գնել ենք 220 դրամով, հիմա գնում ենք 280–ով, դրա համար էլ մեր վաճառքն էլ ենք թանկացնում: Եթե մրցակցային մարմնին 280–ի գինն է ցույց տալիս, վերջինս այլևս ասելիք չունի: Կառավարությունը հո շատ լավ գիտի, որ այնտեղ երկու գնով էլ վաճառում են: Պետությունը, եթե խոսելու տեղը գործ է անում, ասում է՝ այնտեղ էժան բենզին կա, գնացեք բերեք: Պետությունն ինչ թելադրում է, նա էլ անում են»,– շեշտեց նա:

Պաշտոնական տվյալներով, բենզինը այս տարվա ընթացքում թանկացել է ավելի քան 10%–ով։ Նույն ժամանակահատվածում դիզելային վառելիքի գինը բարձրացել է գրեթե 14%–ով։

Ազգային վիճակագրական ծառայության տվյալներով՝ 2017 թ. սեպտեմբերին օգոստոսի համեմատ բենզինի և դիզելային վառելիքի գներն աճել են համապատասխանաբար՝ 0,8% և 0,1%–ով, իսկ 2016 թ. դեկտեմբերի համեմատ արձանագրվել է 11,1% և 13,9% գնաճ:

Նշենք, որ բենզինի և դիզվառելիքի շուկայում գերիշխող դիրքում են «Ֆլեշ» (բենզինի շուկայի 42,62% և դիզվառելիքի` 47,3%–ը) և «Սիթի Պետրոլ Գրուպ» (SPC) (համապատասխանաբար` 41,76% և 40,8%) ընկերությունները:

Շարունակությունը՝ «Փաստ» օրաթերթի այսօրվա համարում