Այսօր Արթուր Սարգսյանի ծննդյան օրն է. Հաց բերողի օր

Ճեղքելով ոստիկանական պատնեշը, վտանգելով կյանքկը, Արթուր Սարգսյանը ՊՊԾ գնդում փակված «Սասնա ծռեր» խմբի անդամներին հաց հասցրեց։ Նա մարդ էր, որին այս կարճ ժամանակահատվածում ճանաչեց և սիրեց ողջ հայ ժողովուրդը։

Արթուր Սարգսյանը ծնվել է 1968 թ. օգոստոսի 9-ին, Երևանում, գիտնականների ընտանիքում: Ավարտել է Ֆիզ.մաթ դպրոցը: 1992-ին գերազանցությամբ ավարտել է Երևանի պոլիտեխնիկական ինստիտուտը: Զուգահեռաբար սովորել է նույն ինստիտուտի բժշկական կիբեռնետիկայի բաժնում, ավարտել է 1989-ին: 2002-ին գերազանցությամբ ավարտել է Երևանի ֆինանսաբանկային համալսարանի իրավագիտության ֆակուլտետը, 2007-ին նույն համալսարանի Ֆինանսներ և վարկ բաժինը:

Նա նաև լավ փորագրիչ էր, իր աշխատանքները վաճառում էր Վերնիսաժում: Արթուր Սարգսյանն ապրում էր միայնակ, ուներ դուստր, որը բնակվում է ԱՄՆ-ում: Արցախյան ազատամարտի մասնակից է, այդ տարիներին էլ նա սնունդ է հասցրել առաջին գծում կռվողներին:

«Սասնա ծռեր»-ին աջակցելու մեջ մեղադրվող Արթուր Սարգսյանը կալանքի հետ անհամատեղելի հիվանդություն ունենալու պատճառով ազատ արձակվեց դեկտեմբերի 30-ին, ապա կրկին կալանավորվեց՝ քննչական մարմին չներկայանալու պատճառաբանությամբ: Իրեն ազատ արձակելու պահանջով Սարգսյանը 25 օր հացադուլի մեջ էր: Նրա խափանման միջոցը փոխվեց միայն մարտի 6-ին՝ մի խումբ պատգամավորների անձնական երաշխավորության դիմաց: 10 օր անց նա մահացավ։

Ի պատիվ կյանքը վտանգելով ՊՊԾ գունդը գրաված «Սասնա ծռեր» խմբի անդամներին հաց հասցնող Արթուր Սարգսյանի՝ հասարակական պահանջ-առաջարկ է ներկայացվել, որպեսզի յուրաքանչյուր օգոստոսի 9-ին (Ա.Սարգսյանի ծննդյան օրը) նշվի որպես հաց բերողի օր։ Առաջարկվում է այդ օրը սնունդ նվիրել դրա կարիքը ունեցող մարդկանց:

Ամբողջական՝ այստեղ