Ցրվենա Զվեզդան առաջին խաղում ջախջախեց Փյունիկին

Չեմպիոնների լիգայի որակավորման երրորդ փուլի առաջին խաղում Հայաստանի չեմպիոն «Փյունիկը» 0։5 հաշվով պարտվեց «Ցրվենա Զվեզդային»։

«Ռայկո Միտիչի» անվան ստադիոնում կայացած խաղում Սերբիայի չեմպիոնը 3 գոլ խփեց առաջին կեսում։  29-րդ րոպեին խաղի հաշիվը բացեց «Ցրվենա Զվեզդայի» կիսապաշտպան Օսման Բուկարին։ 35-րդ րոպեին գոլի հեղինակ դարձավ սերբական թիմի ֆուտբոլիստ Կինգս Կանգվան։ 44-րդ րոպեին Բուկարին հաշիվը դարձրեց 3։0՝ դառնալով դուբլի հեղինակ։

Երկրորդ խաղակեսի միջնամասում Սերբիան ներկայացնող թիմը ևս երկու գոլ խփեց։ 70-րդ րոպեին Բուկարին դարձավ հեթ-տրիկի հեղինակ, իսկ 8 րոպե անց Ստեֆան Միտրովիչը հաշիվը դարձրեց 5։0։

Հանդիպման 90-րդ րոպեին տանտերերի պաշտպան Միլան Ռոդիչը վայրկյանների տարբերությամբ 2 դեղին քարտ ստացավ և հեռացվեց խաղադաշտից։

«Փյունիկ» – «Ցրվենա Զվեզդա» պատասխան հանդիպումը կկայանա օգոստոսի 9-ին՝ Երևանում։