40 օրվա «անլուծելի» ծանր խնդիրը լուծվեց ընդամենը 2 ժամում. «Փաստ»

«Փաստ» օրաթերթը գրում է.

Մայրաքաղաքի Ուլնեցի փողոցի 2–րդ փակուղում գտնվող բնակելի շենքերում արդեն մոտ 40 օր է ջուր չկա: Նշված վայրում կան նաև գործող բազում ավտոլվացման ու սննդի կետեր, որոնք նույնպես առանց ջրի չեն կարող գոյատևել: Բայց զավեշտալին այն է, որ այս օրերին նշված օբյեկտներում ջուրը գրեթե մշտապես եղել է, իսկ բնակիչներին տրվող ջուրը՝ կտրվել:

Բնակիչները բազում անգամ ահազանգել են թե՛ «թեժ գծին», թե՛ Քանաքեռ–Զեյթուն համայնքի ջրմուղ կոյուղու գրասենյակ, բայց բոլոր բողոքներն այդպես էլ օրերով մնացել են օդում կախված:

Մարդիկ ճարները կտրված դիմել են «Փաստի» խմբագրություն: Բնակիչներն ասում էին, որ 61 թվականից մինչ վերջերս նման խնդիր չի եղել, քանի որ Գառնիից ինքնահոսով եկող ջուրն իրենց ճամփով է գնում: Բայց հիմա այնպիսի իրավիճակում են հայտնվել, որ գարշահոտի պատճառով նույնիսկ տուն չեն կարողանում մտնել:

«Այս ամռան շոգին չգիտենք լողանալու, թե զուգարանի համար ջուր բերենք, բայց էլ չենք դիմանում: Շենքերում տարեցներ, երեխաներ կան, մարդիկ չեն կարողանում իրենց կարգի բերեն, որ աշխատանքի գնան: Մի մասն էլ առավոտյան շուտ են աշխատանքի գնում, որ կարողանան այնտեղ իրենց կարիքները հոգան ու իրենց կարգի բերեն»,– ասում էին բնակիչները:

Նրանց ավելի շատ զայրացրել էր, որ իրենց բոլոր ահազանգերը արհամարհվել էին համայնքի, քաղաքի և ջրամատակարարմամբ զբաղվող միակ՝ «Վեոլիա Ջուր» ընկերության ղեկավարության կողմից: Հակառակ դեպքում մեկ–երկու օր հետո հարցը կլուծվեր ու նորից կվերականգնվեր ջրամատակարարումը: Բայց քանի որ օր օրի վիճակը ծայրահեղության էր հասել, բնակիչները ստիպված էին եղել դիմել մեզ:

Բողոքի հետքերով կապ հաստատեցինք «Վեոլիա Ջուր» ՓԲԸ մամուլի պատասխանատու Մուրադ Սարգսյանին, ով բողոքը լսելուն պես, անմիջապես նետեց, թե՝ «ինչ եք ասում, այդքան օր մարդիկ եթե ջուր չունենային, հիմա մեռած կլինեին»:

Նա խոստացավ տեղեկությունը ճշտել և իրավիճակի մասին մեզ տեղեկացնել: Ժամեր անց իմացանք, որ ջրամատակարարումն արդեն վերականգնված է, իսկ ջուրը կտրելու պատճառների մանրամասները հետևյալն էր:

«Զեյթունի տեղամասի պետն ասաց, որ նույն փողոցի առաջին փակուղի թիվ 6 շենքի մոտ վթար է եղել, որի հետևանքով ջուրը ողջ փողոցով հոսում էր և ճնշումը չէր բավարարում, որ ջուրը բարձրանա 2–րդ և 3–րդ փակուղիներ: Խոստացել են երկու ժամվա ընթացքում վթարը վերացնել ու վերականգնել ջրամատակարարումը»,– ասաց Մ. Սարգսյանը:

Մենք կրկին կապ հաստատեցինք բնակիչների հետ և իսկապես պարզեցինք, որ ջրամատակարարումը վերականգնված է: Փաստորեն, կարող ենք արձանագրել, որ «թեժ գծերը» կամ չեն աշխատում, կամ էլ նստած խնդիրները կոծկելով են զբաղված: Հակառակ դեպքում մարդիկ այսքան ժամանակ այդքան նյարդ ու ժամանակ չէին վատնի ոչ «թեժ գծի» և ոչ էլ տեղամասի պետին օրերով խնդրելու համար, միանգամից կդիմեին մեզ և մարդկանց ջրամատակարարման վերականգմնան հարցը ոչ թե օրերով կհետաձգվեր, այլ՝ վաղուց վերականգնված կլիներ:

 Շարունակությունը` «Փաստ» օրաթերթի այսօրվա համարում