«Վրացական երազանք» իշխող կուսակցության նախագահը ստախոս է անվանել Վրաստանի նախկին վարչապետ Գախարիային

Վրաստանում իշխող «Վրացական երազանք» կուսակցության առաջնորդ Իրակլի Կոբախիձեն ստախոս է անվանել նախկին վարչապետ Գեորգի Գախարիային, իսկ հրաժարականի մասին նրա որոշումը համեմատել է «մեջքից հարվածի» հետ:

Ինչպես փոխանցում է Новости-Грузия-ն, Կոբախիձեն վստահություն է հայտնել, որ ապագայում հասարակությունը կգիտակցի, թե ինչում էր կայանում Գախարիայի սուտը:

«Գախարիան ստել է, առաջին հերթին, փետրվարի 17-18-ը, և դա ծանր սուտ էր: Ցավոք, ռեժիմը շարունակվում է, և ապագայում դրա նշաններն ակնհայտ կդառնան հասարակության համար: Փետրվարի 17-18-ը Գախարիան ստել է այդ բառի լայն իմաստով՝ դանակով մեջքից հարվածելով իր թիմին, որը շատ ծանր քայլ էր նրա կողմից»,- ասել է Կոբախիձեն:

Լրագրողները հետաքրքրվել են գործող վարչապետ Իրակլի Ղարիբաշվիլիից՝ արդյոք համակարծիք է Կոբախիձեի հետ, վերջինս խուսափել է ուղիղ պատասխանից: «Բոլոր մարդկանց գործողություններին համապատասխան գնահատականներ կտրվեն»,- ասել է Ղարիբաշվիլին:

Հիշեցնենք, որ Գախարիան փետրվարի 18-ին հայտարարել էր կառավարության ղեկավարի պաշտոնից հրաժարական ներկայացնելու մասին, ինչի համար որպես պատճառ վերջինս նշել էր տարաձայնություններն իր թիմի հետ՝ կապված «Միասնական ազգային շարժում» ընդդիմադիր կուսակցության ղեկավար Նիկա Մելիայի ձերբակալության հետ: