Մի շարք եվրոպական քաղաքներում բողոքի ցույցեր են տեղի ունեցել՝ հաջակցություն Պաղեստինի

Շաբաթ Բեռլինում բողոքի ցույց է անցկացվում՝ ընդդեմ Պաղեստինի դեմ ուղղված իսրայելական քաղաքականության: Ինչպես հայտնում է ՏԱՍՍ գործակալության թղթակիցը, ցուցարարները երթ են իրականացրել՝ ի նշան աջակցության պաղեստինցիների:

Բողոքի ակցիայի առաջին երկու ժամն անցել է առանց միջադեպերի: Անվտանգությունը գերմանական մայրաքաղաքում ապահովում է մոտ 1000 ոստիկան:

Պաղեստինին աջակցություն հայտնելու նպատակով ցույցեր են կազմակերպվել նաև Իսպանիայի մի շարք քաղաքներում, այդ թվում՝ մայրաքաղաք Մադրիդում, որտեղ հազարավոր մարդիկ են հավաքվել: Ակցիայի մասնակիցները երթով անցել են Կառլ V-ի հրապարակով՝ հասնելով Պուերտա դել Սոլ (Մադրիդի գլխավոր հրապարակ):

Ինչպես հաղորդում է «ՌԻԱ Նիովոստի»-ն, ցուցարարները պաղեստինյան դրոշներ են ծածանել: Նրանց երթը նվիրվել է «Նակբայի»՝ պաղեստինցիների ազգային աղետի օրվա 73-րդ տարելիցին, որը համընկնում է Իսրայելի ստեղծման հետ: Ցույցերն անցկացվել են Ալմերիայում, Կորդոբայում, Գրանադայում, Բիլբաոյում, Սան Սեբաստյանում, Բարսելոնայում, Սարագոսայում, Ժիրոնայում:

Բացի այդ, հազարավոր մարդիկ մասնակցել են Բրյուսելում անցկացվող ակցիային, որի նպատակն է ուշադրություն հրավիրել պաղեստինյան տարածքներում Իսրայելի գործողություններին: Գործակալությունը տեսանյութ է հրապարակել դեպքի վայրից:

Հիշեցնենք, որ նմանօրինակ ցույց է անցկացվել նաև Փարիզում, որտեղ ցուցարարներին ցրել են ջրցան մեքենաների և արցունքաբեր գազի կիրառմամբ: