Դեղերի գնի նվազեցում և դրանց՝ ԱԱՀ–ից ազատում. թեկնածուների առողջապահական ծրագրերը. «Փաստ»
«Փաստ» օրաթերթը գրում է.
Առողջապահությունն այսօր կարևորագույն տեղ է զբաղեցնում մեր պետական համակարգում և առաջիկա ընտրություններին մասնակից կուսակցություններն ու դաշինքները ահա թե ինչպիսի առողջապահական բարեփոխումներ են մտադիր կատարել պատգամավորական մանդատները ստանալուն պես։
«ՕՐՕ» դաշինքի նախընտրական ծրագրում կարդում ենք` «Նպատակ ենք հետապնդում, որ ամենամոտ ապագայում քառասուն տարին լրացած ՀՀ յուրաքանչյուր քաղաքացի տարին առնվազն մեկ անգամ ենթարկվի ամբողջական պարտադիր բուժհետազոտության: Կարևորում ենք պոլիկլինիկաներում և Շտապ օգնության ծառայությունում աշխատողների աշխատավարձերի բարձրացումը»:
ՀՀԿ–ն էլ առողջապահական համակարգի արդյունավետությունը և ծառայությունների որակը բարձրացնելու համար գալիք տարիներին անհրաժեշտ է համարում տեղայնացնել առավել առաջադիմական համարվող եվրոպական և ամերիկյան բժշկական ասոցիացիաների վավերացված գործելակարգերը և դրանց հիման վրա ներդնել պացիենտների վարման կլինիկական ուղեցույցներ և պարտադիր կատարման գործելակարգեր, իրականացնել արտահիվանդանոցային և հիվանդանոցային հատվածների գործառույթների հստակ տարանջատում և ներդնել բժշկական անձնակազմի մասնագիտական գործունեության ստանդարտների և գործունեության արդյունքներով խրախուսական մեխանիզմներ, մշակել և իրագործել պետական ամբուլատոր հաստատություններում առկա թերությունների և խնդիրների վերացմանն ուղղված կադրային, գույքային և մասնագիտական բարեփոխումների ծրագիր։
Կոնգրես–ՀԺԿ դաշինքի նախընտրական ծրագրում առանց երկար–բարակ վերլուծությունների ասված է՝ առողջապահության ոլորտի պետական բյուջետային ֆինանսավորումը հասցնել ՀՆԱ առնվազն 3 տոկոսի և ներդնել պարտադիր համընդհանուր բժշկական ապահովագրության համակարգ:
«ԵԼՔ» դաշինքն էլ առողջապահական ոլորտին առնչվող հետևյալ քայլերը կձեռնարկի՝
«Պետպատվերի համար պետական բյուջեով նախատեսված գումարը կտրամադրվի ոչ թե հիվանդանոցներին, այլ այն հիվանդներին, ովքեր պետպատվերից օգտվելու իրավունք ունեն, և նրանք հնարավորություն կունենան ընտրելու՝ որ բուժհաստատությունում բուժվել: Հաջորդ հինգ տարիների ընթացքում առողջապահությանը հատկացվող բյուջետային միջոցները կկրկնապատկվեն: Դեղերի արտադրությունը և վաճառքը կազատվեն ավելացված արժեքի հարկից, ինչի շնորհիվ առաջիկա մեկ տարվա ընթացքում դեղերի գները կնվազեն»:
Հայկական Վերածնունդ Կուսակցությունը առաջարկում է առողջապահության ապահովագրության քաղաքակիրթ համակարգի ներդրում՝ պետպատվերի համակարգի փոխարինում հասցեական գումարային սերտիֆիկատներով և բոլոր կարիքավոր քաղաքացիներին դրանց տրամադրում: Նրանք նաև խոստանում են երկրում տարածված հիվանդությունների և վիրահատությունների համար երաշխավորված պետական աջակցության մեխանիզմների ներդրում, ինչպես նաև բժիշկների, բուժաշխատողների աշխատավարձերի շարունակական բարձրացում և ինդեքսավորում:
«Ծառուկյան» դաշինքի նախընտրական ծրագրում նույնպես պետպատվերի սերտիֆիկացման վերաբերյալ տողեր կան, մասնավորապես՝ իշխանության գալով նրանք պատրաստվում են առողջապահական ոլորտում արմատապես փոխել պետական պատվերի տրամադրման համակարգը՝ սոցիալապես անապահով խավերին, զինծառայողներին և օրենքով սահմանված այլ շահառուներին տրամադրել իրենց հասանելիք սերտիֆիկատը: Վերջինները նաև առաջարկում են արգելել անորակ դեղերի ներմուծումը և բացառել դեղերի անհարկի բարձր գների մենաշնորհային դրսևորումները։
Հայաստանի Կոմունիստական Կուսակցությունը իր ծրագրում գրել է, որ դեղագործության ոլորտում անհրաժեշտ է մեծացնել տեղական արտադրության ծավալները, ինչպես «ԵԼՔ» դաշինքի ծրագրում՝ այստեղ նույնպես դեղերի վաճառքը ԱԱՀ–ից ազատելու վերաբերյալ խոսք կա։
Դաշնակներն էլ մտադիր են ստեղծել առողջապահական ապահովագրության այնպիսի համակարգ, որ մեր որևէ հայրենակից զուրկ չլինի բուժում ստանալու հնարավորությունից: «Որևէ մեկը չպետք է տառապի կամ մահանա, քանի որ դեղի կամ բժշկի փող չունի»,– գրված է նրանց նախընտրական ծրագրում:
«Ազատ դեմոկրատների» նախընտրական ծրագրում առողջապահության վերաբերյալ առաջարկներ չգտանք։
Շարունակությունը` «Փաստ» օրաթերթի այսօրվա համարում:
Հրատապ. Սյունիքը կտրվելու է,Ալիևը Տիգրանաշեն զորք է մտցնելու. Գեներալ Արշակ Կարապետյան
Ակնկալում եմ ձեր ազնիվ պատասխանները. Արշակ Կարապետյան
Իսպանական քաղաքում ցլերի հետ ավանդական վազքի ժամանակ 10 մարդ է վիրավորվել
Ինչպե՞ս են փոխում հանքային հսկաների անվադողերը. տեսանյութ
Ձևավորվել է Գագիկ Ծառուկյանի պաշտպանության հանրային կոմիտե՝ կազմված սփյուռքի եւ Հայաստանի հեղինակավո...
3 նախարարությունների անվանումները կփոխվեն. Կառավարության կառուցվածքի փոփոխության նախագիծը ընդունվեց
Շինծու գործերի սնանկությունը. Ավետիք Չալաբյանի դեպքի քաղաքական ու իրավական ուղերձները. «Փաստ»
Ավտոտնակում հիմնադրված հայկական բիզնես. խաղեր՝ իրական շփման համար
Ո՞ւր են տանում անշարժ գույքի շուկայի նոր «բումի» սուր կողմերը. «Փաստ»
Ինչո՞ւ է Սփյուռքը թիրախավորվում, և ո՞ւմ շահերին են ծառայում իշխանությունները. «Փաստ»
