Երկրորդ եռամսյակի արդյունքներով Հայաստանի ՀՆԱ անկումը տարեկան կտրվածքով կազմել է 13,7 տոկոս․ Վիճկոմիտե

Ընթացիկ տարվա երկրորդ եռամսյակի արդյունքներով Հայաստանի ՀՆԱ անկումը տարեկան կտրվածքով կազմել է 13,7 տոկոս։ Այս մասին վկայում են Հայաստանի Վիճակագրական կոմիտեի հրապարակած տվյալները։

Երկրորդ եռամսյակի արդյունքներով Հայաստանի ՀՆԱ-ն ընթացիկ շուկայական գներով կազմել է 1,270 տրլն դրամ, ինչը առաջին եռամսյակի ցուցանիշները գերազանցում է 0,4 տոկոսային կետով։ Հիշեցնենք, որ առաջին եռամսյակում Հայաստանի ՀՆԱ-ն կազմել էր 1,268 տրլն դրամ, ինչը չնայած եւ 3,9 տոկոսով գերազանցել է 2019 թվականի առաջին եռամսյակի նույն ցուցանիշները, բայց նախորդ եռամսյակի համեմատությամբ գրանցվել է 38,7 տոկոսով զգալի անկում։ Այսպիսով՝ առաջին կիսամյակի արդյունքներով ՀՆԱ անկումը տարեկան կտրվածքով ընդհանուր կազմել է շուրջ 7,07 տոկոս։

Երկրորդ եռամսյակի արդյունքներով ՀՆԱ 10,8 տոկոսը բաժին է ընկնում գյուղատնտեսությանը, նույնքան՝ մեծածախ եւ մանրածախ առեւտրին, 12,6 տոկոսը՝ վերամշակող արդյունաբերությանը։ ՀՆԱ ծավալում շինարարության բաժինը կազմել է ընդամենը 4,8 տոկոս, հյուրանոցային բիզնեսի եւ հանրային սննդի բաժինը՝ ընդամենը 0,7 տոկոս։ Համեմատության համար՝ ՀՆԱ-ում վերոհիշյալ 2 ոլորտների բաժինը անցյալ տարվա նույն ժամանակահատվածի արդյունքներով կազմել է համապատասխանաբար՝ 6,1 տոկոս եւ 2,4 տոկոս։ ՀՆԱ-ում համապատասխանաբար՝ 0,2 եւ 0,4 տոկոսով մեծացել են գյուղատնտեսության եւ վերամշակող արդյունաբերության բաժինները։

ՀՆԱ-ի կառուցվածքը փոփոխություններ է կրել նաեւ ֆինանսական եւ ապահովագրական գործունեության, ինչպես նաեւ անշարժ գույքի հետ կապված գործունեության բաժնի մասով։ Այսպես՝ եթե 2019 թվականի երկրորդ եռամսյակում ՀՆԱ-ում ֆինանսական եւ ապահովագրական գործունեության բաժինը կազմում էր 6,0 տոկոս, ապա այս տարվա նույն ժամանակահատվածի արդյունքներով մեծացել է եւ կազմել 7,8 տոկոս։ Անշարժ գույքի գործարքների հատվածում հակառակ իրավիճակն է՝ 2019 թվականի անցյալ եռամսյակի արդյունքներով 8,3 տոկոսից ՀՆԱ-ում բաժինը կրճատվել է մինչեւ 6,7 տոկոսով կամ 1,6 տոկոսային կետով։

2020 թվականի երկրորդ եռամսյակի արդյունքներով բնակչության մեկ շնչին բաժին ընկնող ՀՆԱ-ն կազմել է 429.4 հազար դրամ կամ 886 դոլար, ինչը առաջին եռամսյակի նույն ցուցանիշը գերազանցում է 113 դոլարով, սակայն զգալիորեն ցածր է անցյալ տարվա նույն ժամանակահատվածի ցուցանիշից։ Այսպես՝ 2019 թվականի երկրորդ եռամսյակի արդյունքներով բնակչության մեկ շնչին բաժին ընկնող ՀՆԱ-ն կազմել է շուրջ 500,3 հազար դրամ կամ 1040 դոլար։