Մեծ Բրիտանիայում աճուրդի կհանվի արաբ շեյխից առգրավված շքեղ մեքենաների հավաքածուն (լուսանկարներ)

Ferrari, Rolls-Royce, Porsche և այլ հեղինակավոր մեքենաշինական բրենդների փոխադրամիջոցներից բաղկացած խոշոր հավաքածուն, որը նախկինում պատկանել է Մեծ Բրիտանիայում բնակվող արաբ շեյխի, Լոնդոնի Բարձր դատարանի որոշմամբ հանվելու է աճուրդի:

Ինչպես հայտնում է The Daily Mail-ը, թանկարժեք մեքենաների հավաքածուն լոնդոնաբնակ շեյխից առգրավվել է ֆինանսական խնդիրների պատճառով:

Ընդհանուր առմամբ, հավաքածուում ներառված է 16 մեքենա, որոնք պահպանվել են հիանալի վիճակում:

Նշվում է, որ բոլոր մոդելները H&H Classics-ի կողմից աճուրդի են հանվելու բավական ցածր գներով, որպեսզի հավաքածուն հաջողվի հնարավորինս կարճ ժամանակում վաճառել:

Պարբերականը մանրամասնում է, որ աճուրդը կայանալու է այսօր:

Հիշեցնենք, որ օրերս իտալական Միլան քաղաքում աճուրդի էր հանվել տեղի գործարարներից մեկից առգրավված շքեղ մեքենաների հավաքածուն, որում ներառված էր 439 փոխադրամիջոց: Հայտնի է, որ հավաքածուն տիրոջից առգրավվել էր հարկերի չվճարման դիմաց: