Մարուքյանի բազմաչարչար անցյալը չէր կարող անհետևանք մնալ

Գևորգ Հակոբյանը ֆեյսբուքյան իր էջում գրում է.

Դեկտեմբերի 9-ի ընտրություններին ընդառաջ, յուրաքանչյուր քաղաքացի, ով ընտրելու իրավունք ունի, պետք է հստակ ճանաչի յուրաքանչյուր կուսակցությանն ու դաշինքին, և որ ամենակարևորն է՝ առաջին դեմքերին, այսինքն այն մարդկանց, ովքեր հանդես են գալիս առաջին համարի ներքո։ Ծանոթությունը արժե սկսել Էդմոն Մարուքյանից, հենց նրա մասին ամենաշատը խոսելու կարիք կա, քանի որ հենց նա է «գառան դիմակով գայլը»։
Սկսենք ոչ վաղ անցյալից՝ հեղափոխության օրերից։ Նիկոլ Փաշինյանը օրեր շարունակ քայլում էր, պահանջելով այն ժամանակվա իշխանության հրաժարականը, իսկ ի՞նչ էր անում Մարուքյանը՝ կոչ էր անում դադարեցնել այդ «անիմաստ» ցույցերը, ժողովրդին հորդորում էր տուն գնալ, ամեն կերպ փորձում էր գործող իշխանությանը հաճոյանալ։ Սակայն Փաշինյանին ու նրան հետևող ժողովրդին կանգնեցնելը հեշտ գործերից չէր, և դա գիտակցելով, Մարուքյանը լծվեց Փաշինյանին հաճոյանալու բարդ գործին։ Հեղափոխությունից հետո ամեն կերպ, բոլոր հարթակներում բարձրաձայնում էր, որ կողմ է եղել հեղափոխությանը, բայց ժողովրդի հիշողությունը այդքան էլ կարճ չէ։
Մտածելով, թե ժողովուրդը կերել է «կուտը», Մարուքյանը որոշել է, որ կարող է առաջադրվել որպես պատգամավորի թեկնածու, դա էլ հերիք չէ, աչք է դրել ԱԺ-ում երկրորդ տեղի վրա։ Դեկտեմբերի 5-ին տեղի ունեցած առաջին դեմքերի դեբատից հետո, Մարուքյանի վարկանիշը գրեթե զրոյացավ, չներկայացնելով ոչ մի ծրագրային դրույթ, ու խուսափելով շատ հարցերին պատասխանելուց՝ ընտրություններից հետո Մարուքյանը թող չզարմանա, եթե նույնիսկ 1 տոկոս ձայն չհավաքի։ Այս ամենը հերիք չէր, այդ իսկ պատճառով Մարուքյանը հայտարարեց, որ եթե «Ծառուկյան» դաշինքը 2017 թվականին չառաջադրվեր, ապա իր դաշինքը ԱԺ-ում երկրորդ տեղում կհայտնվեր։ Այս արտահայտությունից հետո եղած հավատը հոդս ցնդեց։ Հասուն քաղաքական գործիչը երբե՛ք նման արտահայտություն չէր անի։
Մարուքյա՛ն, պատկերացնում եք, եթե ՀՀԿ-ն չառաջադրվեր, դուք դեռ երկու տարի առաջվանից իշխանության եկած կլինեիք։ Ծիծաղելի ե՛ք, նայեք, թե ինչ հետևանքներ է ունենում մեկ անմտածված արտահայտությունը։ «Տասը չափեք, մեկը կտրեք», հակառակ դեպքում կհայտնվեք քաղաքական լուսանցքում։