Ուժեղ մրցակցի հայտնվելու հանգամանքը գլխիվայր փոխեց ՀԲՖ ղեկավարության նախկինում արված հայտարարությունը

Սոֆյա Ասատրյանը գրում է.

Օգոստասի 14-ին բռնցքամարտի ֆեդեռացիայի ներկայացուցիչները հանդիպել էին ՀԱՕԿ նախագահ Գագիկ Ծառուկյանին և սպորտի ու երիտասարդության հարցերի նախարար Լևոն Վահրադյանին և ներկայացրել իրենց բողոքը, կապված ֆեդերացիայի ներկայիս գործնեության և հիմնականում ֆեդերացիայի նախագահի ընտրության կարգի հետ:

Բողոքին հաջորդած ՀԲՖ-ի նախագահի մի շարք կոպիտ խախտումներով իրականացրած ընտրությունը, մեծ աղմուկ առաջացրեց: Անգամ Սպորտի և երիտասարդության հարցերի նախարարը հայտարարեց, որ դիմել է բռնցքամարտի միջազգային ֆեդերացիային (AIBA), որպեսզի ուսումնասիրեն այս խախտումներն ու անվավեր ճանաչեն անօրինական ընտրությունները:

Սակայն այս պատմության մեջ կար մի պահ, որը նույնքան զայրացրեց, որքանով որ ստիպեց ծիծաղել: Խոսքը մի քանի ժամանակ առաջ ՀԲՖ ղեկավարության կողմից արված հայտարարությունն էր: Այդ հայտարարությունում պարզ ասվում էր, որ եթե լինի ինչ-որ մեկը, որը 500:000 դոլար ներդրում կանի և իր ծրագիրը կունենա, ապա դաշտը բաց է և կարող է գալ մասնակցել ընտրություններին: Մինչդեռ օրեր առաջ, մամուլով տեղեկատվություն տարածվեց և ականավոր մարզիչներ հայտարարեցին, որ ընտրությունները կազմակերպվել է ոչ պատշաճ, իրազեկում կատարվել է թերի, ինչի արդյունքում թեկնածություն առաջադրելն ուղղակի խոչընդոտվել է ՀԲՖ-ի կողմից: Այդ դեպքում, ինչ արդար և բաց ընտրության մասին էր խոսում ՀԲՖ ղեկավարությունը, երբ առկա են նման բացթողումներ, որոնք չեն բխում նույն արդար և թափանցիկ ընտրությունների տրամաբանությունից:

Իսկ այսօր, ասուլիսի ժամանակ, ՀԲՖ ղեկավարությունը, երբ արդեն իսկ հասկացավ, որ այո՝ կա մարդ, ով պատրաստ է նման ներդրում անել և զարգացնել բռնցքամարտը, այն որակեց որպես կաշառք: Հետաքրքիր է, ի՞նչ փոխվեց այս կարճ ժամանակահատվածում, երբ ներդրումը ՀԲՖ ղեկավարության համար վերածվեց կաշառքի, միթե՞ դա չի խոսում նրա մասին, որ ՀԲՖ ղեկավարությունը ժամանակավրեպ հայտարարություններ էր անում և պատրաստ չէր նման մրցակցության, ինչն էլ պարզ դարձավ այն ժամանակ, երբ ամեն ինչ արվեց, որպեսզի թեկնածուն լիներ միակը: Ինչևէ կարծում ենք ամեն ինչ առավել քան ակներև է, հետևություններն էլ թողնում եմ ընթերցողին: