Հայկ Սուքիասյան. «ՀՀ–ում թավշյա հեղափոխությունը հաղթել է. ՀՀԿ–ն այլևս իշխանություն չունի». «Փաստ»

«Փաստ» օրաթերթը գրում է.

Այս օրերին համաժողովրդական շարժմանն են միանում մի շարք քաղաքական գործիչներ, անգամ նրանք, ովքեր ՀՀԿ–ի ամենահավատարիմների շարքերում են եղել տարիներ շարունակ: Քաղաքական ողջախոհությո՞ւն, թե՞ ստեղծված իրավիճակում ճիշտ կողմնորոշվելու արդյունքում է սա, պետք չէ դատել: Ամեն ինչ ցույց կտան ժամանակն ու հետագա զարգացումները: Մի քանի օր անց, մայիսի 1–ին տեղի կունենա ԱԺ հատուկ նիստ՝ նոր վարչապետ ընտրելու նպատակով: «Ելք» խմբակցության վարչապետի թեկնածուն Նիկոլ Փաշինյանն է, ով, ըստ քաղաքագետ Հայկ Սուքիասյանի, նաև համաժողովրդական թեկնածու է:

Այս օրերին բացի «Ծառուկյան» դաշինքից, համաժողովրդական շարժման ջատագովներ են դարձել այլ քաղաքական ուժեր ևս, ինչպես օրինակ ՕԵԿ–ը և մի շարք այլ քաղաքական գործիչներ: «Ծառուկյան» դաշինքը թեև միացել է ժողովրդին, բայց դեռևս չի հայտնում, թե վարչապետի ընտրության հարցում ինչպես կքվեարկի: Արդյո՞ք հնարավոր է դեպքերի այլ զարգացումների ականատես լինել: Քաղաքագետը այդպես չի մտածում: Նրա խոսքով, Նիկոլ Փաշինյանը հանդիպել է Գագիկ Ծառուկյանի հետ, բայց մենք պարզապես գիտենք միայն երևացող ինֆորմացիան: Ըստ նրա՝ հավանաբար նրանք ունեցել են ինչ–որ ներքին պայմանավորվածություններ:

Քաղաքագետը նշում է, թե պետք է մի բան շատ լավ հասկանալ, այն, որ եթե Նիկոլ Փաշինյանը կարողացել է այս ամբողջ պրոցեսը կազմակերպել, հավանաբար նա այդ բոլոր գիտելիքները ունի, դժվար թե որևէ մեկը այս վիճակում կարողանա անել մի բան, որ Նիկոլ Փաշինյանը չհասկանա:

Անդրադառնալով «Ծառուկյան» դաշինքի՝ շարժմանը միանալուն, Սուքիասյանը նշում է, թե բոլորի համար էլ պարզ է, որ Հանրապետական կուսակցությունը Սերժ Սարգսյանի գլխավորությամբ մեծ հաշվով այլևս իշխանություն չունի: Եվ որքան էլ իրենք ներկայացնեն, թե դեռևս մնում են: Ըստ քաղաքագետի՝ ՀՀ–ում թավշյա հեղափոխությունը հաղթել է, ամբողջ հանրապետությունում տիրում է հեղափոխական տրամադրություն, և մի քանի պատգամավորներ կամ նախարարների ժամանակավոր պաշտոնակատարներ այդ տրամադրության դեմ կանգնել չեն կարող: Մյուս ուժերը իրավիճակը հավանաբար լավ հասկացել են և մոբիլիզանում են Նիկոլ Փաշինյանի շուրջ, որովհետև այլ տարբերակ չունեն:

«Դաշնակցությունը դեռևս իր դիրքորոշումը չի հայտնել: Հավանաբար տակից նորից Հանրապետականին կպաշտպանի, եթե իհարկե հանրապետականները ցանկանան մինչև վերջ պայքարել: Այս պահին Հանրապետական կուսակցությունը պետք է իմանա, որ բացարձակ լեգիտիմություն չունի: Այստեղ իրենք հիմա սկսել են օրենք դեմ տալ, Սահմանադրության այս կետը, այն ստորակետը: Այդ ամենն անիմաստ է, այս պահին Հայաստանում ինքնիշխան է ժողովուրդը, ինչն ամրագրված է նաև Սահմանադրության մեջ:

Ժողովուրդը հաստատել է իր ինքնիշխանությունը և պահանջել է գործող իշխանության հրաժարականը: Եվ երկրի ղեկավարը հրաժարական է տվել: Այստեղ մի շատ կարևոր բան կա: Ասում են՝ վարչապետն է հրաժարական տվել, բայց միայն վարչապետ չի, ըստ էության՝ երկրի ղեկավարն է: Եթե երկրի ղեկավարը հրաժարական է տալիս, իշխանությունն էլ պետք է հրաժարական տա:

Պարզ է, որ կուսակցությունները փորձելու են իրենց դեմքը փրկել, իրենց համար հարմար տեղ զբաղեցնել: «Ծառուկյան» դաշինքը վարչապետի ընտրությանը բաց է քվեարկել, մի մասը քվեարկել էր դեմ, մի մասը՝ կողմ Սերժ Սարգսյանի վարչապետ դառնալուն: Հավանաբար իրենք ինչ–որ տեղ ունեն Նիկոլ Փաշինյանի հետ այդ առումով երկխոսելու»,– նշեց նա:

Անդրադառնալով այն տեսակետին, թե այս օրերին ամենատարբեր քաղաքական գործիչների «մասնակցությունը» շարժմանը չի՞ վարկաբեկում այն, Սուքիասյանը պատասխանեց՝ բացարձակապես:

«Այստեղ խնդիր կա: Խորհրդարանում պետք է քվեարկեն: Շարժումն իր լիդերին առաջադրել է: Պետք է հասկանալ, որ նա ժողովրդական թեկնածու է: Այստեղ քվեարկության հարց կա: Հիմա այդ մարդիկ պետք է ապահովեն ձայների մեծամասնությունը: Նրանք գալիս են Նիկոլ Փաշինյանին ներկայանում են, ասում են, որ նրա կողմն են: Դա նորմալ գործընթաց է: Այդ մարդիկ հնազանդորեն հանձնվել են ժողովրդական շարժմանը և հավանաբար ներկայացնում են, որ իրենք քվեարկելու են, մեխանիկական մասն են ապահովում, բայց միաժամանակ ապահովում են իրենց համար հետագայում անվտանգ կյանք և կենսագործունեություն:

Պարզ է, որ Նիկոլ Փաշինյանը այնքան քաղաքական հոտառություն ունի, որ շատ լավ կհասկանա՝ թե որ կուսակցության հետ ինչպես վարվել»:

Այս թեմայով «Վարորդի ընկեր»-ը դիմել է վարչապետին՝ տույժ-տուգանքների համար համաներում կիրառելու խնդրով. «Փաստ» «Հարցերը նախարարների մակարդակով չեն կարող լուծվել. պետք է բնապահպանական քաղաքականության փոփոխություն լինի». Լևոն Գալստյան. «Փաստ» ԿԳՆ-ն փոխել է 9-րդ և 12-րդ դասարանների պետական ավարտական քննությունների օրերը. «Փաստ» Նորանշանակ գյուղնախարարը 8,5 միլիոն դրամի վարկ է վերցրել. «Փաստ» Կոռումպացված լինելու թույլտվությունն ու արատավոր շղթան. Պայքարի ուղիները՝ ըստ Վարուժան Հոկտանյանի. «Փաստ»