Հակոբ Սանասարյան. «Սևանա լճի մակարդակն ընդհանրապես չեն բարձրացնում». «Փաստ»

«Փաստ» օրաթերթը գրում է.

Սևանա լճի մակարդակը նվազում է: Ըստ ԱԻՆ Հայպեդհիդրոմետ ծառայության՝ նոյեմբերի 13–ի դրությամբ Սևանա լճի մակարդակը կազմել է 1900 47 մետր նախորդ տարվա նույն ժամանակահատվածի 1900 52–ի փոխարեն:

Կանաչների միության նախագահ, բնապահպան Հակոբ Սանասարյանը «Փաստ» օրաթերթի թղթակցի հետ զրույցում ասաց, որ ներկայի և նախորդ իշխանությունների վարած քաղաքականության հետևանքով լճի մակարդակը չի բարձրանում: Ամբիոններից, սակայն, խոսվում է, որ քայլեր է ձեռնարկվում Սևանի ջրային պաշարներն ավելացնելու ուղղությամբ: Բնապահպանը հակառակ կարծիքին է:

«Իրենց հայտարարության հակառակն են անում: Գիտակցաբար, ծրագրված լճի մակարդակը չեն ուզում բարձրացնել: Ջուրը բաց են թողնում: Ժամանակին կարող էին Կեչուտից ջուր տեղափոխել, բայց չեն արել: Կարող եմ ասել, որ իրենք ստախոս են և մարդկանց հետ խաղ են անում: Բոլորը Սևանով տարված են և ասում են, ինչպես նշված է մակարդակը կբարձրացնենք: Սևանի մակարդակն ընդհանրապես չեն բարձրացնում»,– շեշտեց Հակոբ Սանասարյանը:

Բնապահպանը նշեց, որ Համաշխարհային բանկն իր հերթին չի ուզում, որ Սևանի մակարդակը բարձրանա:

«Ունի մի ծրագիր, որը կոչվում է էկոլոգիական հավասարակշռության պահպանման և վերականգնման ծրագիր: Այդտեղ Սևանա լճի մասին ամեն ինչ գրված է: Եվ սրանք սրբորեն կատարում են այդ ծրագիրը: Ասվում է, որ լճի մակարդակի բարձրացումը Հայաստանի տնտեսության համար շատ վտանգավոր է: Պետք է մակարդակի բարձրացումը կատարեն 47 տարվա ընթացքում»,– մեջբերեց նա:

Բացի սա, բնապահպանի աչքից չի վրիպում լճի շրջակայքի կառուցապատումը:

«Սևանի ափին, փաստորեն, քաղաք են կառուցել՝ լրիվ ասֆալտապատ, դղյակներ են կառուցել: Իրենք դղյակներ են կառուցում այն տարածքում, որտեղ պետք է ջուր լինի և մարդկանց ասում են, որ մենք լճի մակարդակի բարձրացման ծրագիր ունենք»,– ասաց Սանասարյանը:

Մի քանի տարի առաջ Կանաչների միության նախագահը Սևանա լճի մակարդակի ամենօրյա ցուցանիշներն էր գրի առնում և մոնիթորինգ կատարում: Ջրի կորուստների մասին բարձրաձայնում էր պատկան կառույցներին: Դրանից, սակայն, Սևանի փրկության հարցը չկարգավորվեց: Հիմա էլ համոզված է՝ ջրի ավելացում չի լինի, այսօրվա մակարդակը կպահպանվի:

«Անընդհատ ստախոսությամբ ջուր կվերցնեն: Ոռոգման նպատակով ամեն տարի ջուր են վերցրել, հետո այդ ծավալները սկսեցին պակասեցնել: Բացի սա, իրենք պետականորեն ջուրը գողանում են: Ժողովրդից գաղտնի իրենց նպատակների համար ջուր են բաց թողնում»,– ասաց նա:

Իսկ ինչպե՞ ս է գնահատում կառավարության՝ Սևանա լճի էկոհամակարգի պահպանման և վերականգնման ուղղությամբ տարվող ծրագիրը, նա արձագանքեց. «Կառավարությունն ընդհանրապես ժողովրդից, ազգից կտրված է: Դա ուռած, փքված մի համակարգ է: Չկա կառավարությունը, իսկ նախարարությունները ֆունկցիոնալ առումով չեն գործում, դրանք նախագահի ճիպոտի կարգադրությանն են սպասում»:

Հիշեցնենք՝ կառավարության առաջարկով այս և առաջիկա տարիների համար Սևանա լճից տարեկան ջրառը նախկին 170 միլիոն խմ–ի փոխարեն, ԱԺ–ի համաձայնությամբ, սահմանվել է 270 միլիոն խմ։

Իսկ սեպտեմբերի 15–ի դրությամբ Սևանա լճից ջրի բացթողումը դադարեցվել է:

Շարունակությունը՝ «Փաստ» օրաթերթի այսօրվա համարում